2014-11-09 20:45

"ღმერთმა ნუ მომასწროს ამ დღეს, მაგრამ თუ ამ ყველაფრის ფინალად ესაა ჩაფიქრებული, ვერაფერს გამოვრიცხავ, მაგრამ უნდა ვთქვა, რომ ირაკლის ამის არ შეეშინდება", - აცხადებს საგარეო საქმეთა ყოფილი მინისტრი მაია ფანჯიკიძე "იმედზე", შეკითხვის პასუხად, ელოდება თუ არა ირაკლი ალასანიას დაკავებას. 

ამასთან, გადაცემაში "იმედის კვირა" მაია ფანჯიკიძემ განაცხადა, რომ სიამოვნებით და დღესვე დაბრუნდება თანამდებობაზე, ოღონდ სხვა შემადგენლობაში. "სხვა შემადგენლობაში თუ სხვა ხელისუფლებაში?", - ამ შეკითხვის პასუხად მაია ფანჯიკიძემ გაიმეორა: "სხვა შემადგენლობაში", ხოლო შემდეგ დაამატა, რომ იმ პირობებში, რა პირობებიც შეიქმნა მოცემულ სიტუაციაში, უნდა გადამდგარიყო პრემიერმინისტრი და არა თავდაცვის მინისტრი.

მაია ფანჯიკიძე არ გამორიცხავს, რომ ირაკლი ღარიბაშვილის გადაწყვეტილებები, შესაძლოა, ყოფილიყო შეთანხმებული ბიძინა ივანიშვილთან. "იმ დამთხვევების ფონზე, რაც ბიძინა ივანიშვილის ინტერვიუში გაისმა, ამას არ გამოვრიცხავ", - განაცხადა მაია ფანჯიკიძემ, ხოლო შეკითხვაზე, შესაძლოა თუ არა ირაკლი ალასანიას გადაყენების მიზეზი გამხდარიყო მისი ცნობილი "მე რა ვქნა, მეე?", მაია ფანჯიკიძე პასუხობს:

"სამი წლის წინანდელი ჩანაწერი? დარწმუნებული ვარ, ეგეთი ჩანაწერი კიდევ ბევრი აქვს".