საქართველოს თავდაცვის მინისტრი ირაკლი ალასანია არ გამორიცხავს, რომ მას შემდეგ, რაც გამოძიების საქმეს საიდუმლო გრიფი მოეხსნება, დადგეს იმ პირების პასუხისმგებლობის საკითხი, ვინც, შასაძლოა, შეცდომაში შეიყვანა საზოგადოება.
ალასანიამ პირველი კომენტარი გერმანიიდან დაბრუნების შემდეგ, აეროპორტში გააკეთა და განაცხადა, რომ ამ დაკავებით ქვეყნის იმიჯს მიადგა დარტყმა, ხოლო საქმეს საიდუმლო გრიფი უნდა მოეხსნას და გამოძიება გამჭვირვალედ ჩატარდეს:
„ძალიან მნიშვნელოვანია, რომ საიდუმლო გრიფი მოეხსნას უკვე ამ საქმეს, იმიტომ რომ უსაფრთხოების კუთხით დიდი დარტყმა მიიღო ქვეყანამ ამ ნაბიჯით. აქედან გამომდინარე, იმ მომენტების საიდუმლოდ შენახვას, რაც თავის დროზე აუცილებელი იყო, რომ საიდუმლო ყოფილიყო, ახლა მნიშვნელობა არა აქვს. ამიტომ, სრული ჭეშმარიტების დადგენისთვის მთავარია გამოძიება ღიად და გახსნილად წარიმართოს.
ასევე მნიშვნელოვანია ისიც, რომ ვინაიდან ამით ჩვენი ქვეყნის უსაფრთხოებას მიადგა ზიანი, რა თქმა უნდა, უნდა შედგეს უმაღლეს პოლიტიკურ დონეზე დისკუსიები ამასთან დაკავშირებით. მე დაგეგმილი მაქვს საქართველოს მთავრობის წევრებთან შეხვედრა, პრემიერმინისტრთან ბუნებრივია, საქართველოს პრეზიდენტთან ვგეგმავ შეხვედრას, პარლამენტის თავმჯდომარესთან, შესაბამის საპარლამენტო კომიტეტებთანაც. ბუნებრივია, როდესაც ყველაფერი დასრულდება, ჩვენ ყველაფერს თავის სახელს დავარქმევთ და პასუხისმგებლობა დადგება უკვე იმ პირების, ვინც შესაძლოა შეცდომაში შეიყვანა საზოგადოება“, - განაცხადა ალასანიამ.
