საქართველოს ყოფილი მთავარი პროკურორი არჩილ კბილაშვილი, რომელიც "კანონიერ ქურდ" ზახარ (შაქრო) კალაშოვის ადვოკატი იყო, კომენტარს არ აკეთებს ესპანეთის მიერ კალაშოვის რუსეთისთვის გადაცემის ფაქტზე.
კბილაშვილის პოზიციით "ტაბულა" დაინტერესდა. როგორც თამარ ჩარგოლეიშვილი "ფეისბუქზე" წერს, კბილაშვილმა განაცხადა, რომ მისგან რაიმეს თქმა არ იქნება მიზანშეწონილი. ამასთან, "ტაბულის" დამფუძნებელი სვამს კითხვას, რატომ დაირღვა ესპანეთსა და საქართველოს შორის 2010 წელს მიღწეული შეთანხმება, რომ კალაშოვი საქართველოს გადაეცემოდა:
"საქართველოში უნდა მომხდარიყო ექსტრადიცია, ესპანეთის მთავრობამ ასე გადაწყვიტა 2010 წელს. კალაშოვის ადვოკატი მაშინ იყო არც მეტი, არც ნაკლები არჩილ კბილაშვილი, ჩვენი ყოფილი მთავარი პროკურორი.
კალაშოვის დაცვა რუსეთში ექსტრადიციას ითხოვდა – ახლა უკვე გასაკვირი არ არის, რატომ. გამოუშვებდნენ და იმიტომ. საინტერესოა რატომ გაუშვეს კალაშოვი საქართველოს ნაცვლად რუსეთში? საქართველოს ხელისუფლებამ თქვა უარი?
ჯერჯერობით პასუხი ვერ გავიგეთ, მაგრამ გავიგებთ. რაც შეეხება კბილაშვილს – მიზანშეუწონელია ამაზე რამე, რომ ვთქვაო. კალაშოვიც იმსახურებს ადვოკატს, მაგრამ კანონიერი ქურდის ადვოკატი, რომ შემდეგ პოლიტიკურ კარიერას იკეთებს, ცოტა უხერხულია", - წერს ჩერგოლეიშვილი.
