2014-10-29 11:36

გივი თარგამაძე გაზეთ „ასავალ-დასავალში“ გამოქვეყნებულ სტატიას ეხმაურება, სადაც მას „მორგის ყოფილი სანიტარი“ უწოდეს და დაწერეს, რომ სააკაშვილი გივი თარგამაძის მეშვეობით სისხლის ტბების დაყენებას გეგმავს.

„ასავალ-დასავალში“ გამოქვეყნებული პუბლიკაციის ავტორით განმარტებით, თუ საქართველოში არეულობა დაიწყება, მაშინ ქვეყანას ბრძოლა მოუწევს არამარტო „პუტჩისტებთან“, არამედ შიზოიდ სექტანტებთან, რომლებიც ცხრა წლის განმავლობაში საპატრიარქოში ჩანერგილი თავიანთი აგენტების მეშვეობით საქართველოს წმინდა სამოციქულო ეკლესიის დისკრედიტაციასა და დანგრევას ცდილობდნენ.

„დღეს შევარდნაძე მიხეილ სააკაშვილია, რომელიც ქვეყანაში ახალი სისხლის ტბების დაყენებას იეღოველების ცნობილი „შპიონის“ გიგა ბოკერიასა და „მორგის“ ყოფილი სანიტრის გივი თარგამაძის მეშვეობით გეგმავს!"

გამოცემის მტკიცებით, საკმარისზე მეტი სამხილები არსებობს იმისთვის, რომ პროკურატურამ გიგა ბოკერია და გივი თარგამაძე დააპატიმროს“

გივი თარგამაძე წერს:

„შვილო, ჰაკიმ, ნუ გეშინია. გიგაზე შენმა პატრონმა ხომ თქვა, მასონების მაგისტრიაო და ესენი კიდევ გატყუებენ, იეღოველები და რაღაც ეგეთებიო. ასე გატყუებენ ჩემზეც - სანიტრად მორგში ერთი წუთითაც არ მიმუშავია, სასწრაფოზე - კი და კიდევ უროლოგია-ნეფროლოგიის ინსტიტუტის საოპერაციო ბლოკში, სადაც, მხოლოდდამხოლოდ, გადარჩენის მიზნით, თირკმელებსა და ჰიდროცელეს, ანუ, ფიზიკური დაზიანების შედეგად განვითარებული შეშუპების შემთხვევაში, სათესლე ჯირყვლებს, ანუ, მამაკაცურად, კვერცხებს აჭრიდნენ. ეგ ვიცი, კი.

შევარდნაძის დროს კობა ნარჩემაშვილის მიერ აღძრულ იმ საქმეს რაც შეეხება, მანდ ჩემი ადვოკატი მაშინ ეკა ბესელია იყო, დახურვით კი რამოდენიმე თვის წინ შენმა სასამართლომ დახურა. ასე რომ, მშვიდად იძინე, ამ ეშმაკებს მე დავაფრთხობ.

P.S. ხო, კიდევ: კობა ოთანაძე ცოცხალია სწორად იმიტომ, რომ მე სანიტრად სასწრაფოზე ვმუშაობდი და არა მორგში“.