2014-10-05 23:44

"რესპუბლიკური პარტიიდან" საკრებულოს წევრი დავით ზურაბიშვილი აცხადებს, რომ ხელისუფლების მიერ "თავისუფალი ზონის" მხრიდან არსებულ საფრთხეზე ლაპარაკი არაადეკვატურია და რომ "თავისუფალი თაობა" ექსტრემისტული ტიპის ორგანიზაციაა.

ამის შესახებ დავით ზურაბიშვილმა "კვირის" პრესკლუბში განაცხადა:

"კობა ხაბაზი თუ აქციას მოაწყობს, ამით ქართული საზოგადოება მათ ჭკუაზე არ გადავა. ამიტომ, „ზონის“ მხრიდან საფრთხეზე ლაპარაკი, რომ ისინი სახელმწიფო გადატრიალებას მოაწყობენ, არასერიოზული და საშიშია. როცა ამაზე ხელისუფლების წარმომადგენლებიც ლაპარაკობენ, ეს იმას ნიშნავს, რომ რეალობის ადეკვატური შეფასება არ ხდება.

რაც შეეხება „თავისუფალ თაობას“, ისიც ექსტრემისტული ტიპის დაჯგუფებაა. ეს ხალხი თავს ხელისუფლების დაცველად ასაღებს და აცხადებენ, რომ მათ უნდა გადაარჩინონ ქვეყანა „თავისუფალი ზონის“ შეთქმულებისგან. მსგავსი რიტორიკა ხელისუფლების წარმომადგენლებშიც შეინიშნება. მისი წაყრუება არავითარ შემთხვევაში არ შეიძლება,“- განაცხადა დავით ზურაბიშვილმა.

მისივე თქმით, არსებობის უფლება ყველა ყველა ორგანიზაციას აქვს, მათ შორის „თავისუფალ ზონასაც“.