ისტორიკოსი ნიკა მაჭუტაძე საეჭვო დამთხვევად მიიჩნევს, რომ ეროსი კიწმარიშვილის გარდაცვალება საქართველოს სხვადასხვა ქალაქში „რუსეთის მიერ შემოგზავნილი „მწვანე კაცუნების“ შემოსვლას ემთხვევა და აცხადებს, რომ სანდო წყაროებიდან კონკრეტული ინფორმაცია ქვს, რომლებსაც, დაინტერესების შემთხვევაში, საგამოძიებო ორგანოებს გაუზიარებს.
ისტორიკოსი ამის შესახებ განცხადებას „ფეისბუქზე“ აკეთებს:
"ახლა აქ ვაკეთებ ძალიან სერიოზულ განცხადებას და ძალიან გთხოვთ გაეცანით.
ამასთანავე ვიტყვი, რომ დაინტერესების შემთხვევაში, მზად ვარ გავესაუბრო/ჩვენება მივცე საგამოძიებო ორგანოებს, შევხვდე, ინფორმაცია მივაწოდო დიპლომატიურ კორპუსს, წარმომადგენლობებს.
საქართველო, კერძოდ, თბილისი, ახალქალაქი და ბათუმი გავსებულია რუსეთის მიერ შემოგზავნილი ე.წ "მწვანე კაცუნებით", რომელთა დავალება, მიზანია საქართველოში დესტაბილიზაციის მოწყობა, შეიარაღებული დაპირისპირება და პროვოკაციები სახელმწიფო მართლწესრიგის, სუვერენიტეტისა და ტერიტორიული მთლიანობის მოშლის მიზნით.
მაქვს კონკრეტული ინფორმაციები ძალიან სანდო წყაროებისგან. ეროსი კიწმარიშვილის გარდაცვალების ფაქტმა კი არსებული მონაცემები გაამყარა და ეჭვები გააძლიერა.
ვიმეორებ: ინფორმაცია ძალიან კონკრეტულია, თუმცა ამჟამად მეტს ვერაფერს ვიტყვი.
P.S ასევე, მზად ვარ, გავესაუბრო ჟურნალისტებს".
„აფხაზეთის ხმა“ ნიკა მაჭუტაძეს უკვე შეუთანხმდა, რომ ის ამ საკითხზე ჩვენთან უფრო ვრცლად ისაუბრებს. მასალას უმოკლეს პერიოდში შემოგთავაზებთ.
