-
2014-06-17 10:06
საქართველოს თავდაცვის მინისტრი ირაკლი ალასანია მარნეულის ერთერთ საარჩევნო უბანში სათვალთვალო კამერის მიერ გადაღებულ ვიდეომასალას ეხმიანება, სადაც ხმების გაყალბების ფაქტია აღბეჭდილი.
„ნაციონალური მოძრაობის“ მიერ გავრცელებულ ვიდეოსთან დაკავშირებით ირაკლი ალასანია აცხადებს, რომ პირი, რომელიც ვიდეოზეა აღბეჭდილი, ხმებს მოდელირებულად აყალბებს და ის ნაციონალ დეპუტატთან დაახლოებული პირია.
ირაკლი ალასანიას მოსაზღებას იმეორებს მარნეულში გამარჯვებული, „ქართული ოცნების“ მიერ არჩევნებამდე რამდენიმე დღით ადრე მოხსნილი კანდიდატი მერაბ თოფჩიშვილი: „აშკარად კამერას უყურებს და ისე ყრის კონვერტებს, ეს კარგად ჩანს“, - ამბობს ის.
მმართველი პარტიის ბრალდებებს ამ ეპიზოდთან დაკავშირებით გიგი უგულავამ უპასუხა. მისი თქმით, პირველი შემთხვევა არ არის, როცა ხელისუფლება თავის ჩადენილ საქციელს „ნაციონალურ მოძრაობას“ ადარებს. მისივე თქმით, დეპუტატი, ვისთან ახლობლობაზეც მიანიშნებს კოალიცია, „მარნეულელი შიხიაშვილია“: „ის დეპორტირდა 1 ოქტომბრის შემდეგ „ნაციონალური მოძრაობიდან“ „ქართულ ოცნებაში“, ასე რომ, ყველაფერი ნათელია“, - ამბობს გიგი უგულავა.
გუშინ „ფრონტნიუსმა“ გამოაქვეყნა ინფორმაცია, რომლის მიხედვითაც პირი, რომელიც ვიდეოზეა აღბეჭდილი, „ქართული ოცნების“ წევრია 2012 წლიდან და ეს მარნეულის ოფიციალურ ვებგვერდზეცაა მითითებული.
შეგახსენებთ, რომ მარნეულში მომხდარი გაყალბების ამსახველი ვიდეოს გამოქვეყნების შემდეგ ოპოზიცია და არასამთავრობო ორგანიზაციები უბნის შედეგების გაუქმებას ითხოვენ. მარნეულის იმ საარჩევნო უბანში, სადაც დარღვევაა დაფიქსირებული, 16 ივნისს, გვიან ღამემდე მუშაობდნენ პროკურატურის წარმომადგენლები, აღძრულია სისხლის სამართლის საქმე.
"ნაციონალური მოძრაობის" ერთერთი ლიდერის, საპარლამენტო უმცირესობის წევრის გოგა ხაჩიძის მიერ გავრცელებული ვიდეომასალა, სადაც გაყალბებაა აღბეჭდილი, ამ მასალას თან ერთვის.