-
2015-12-01 01:55
მედიაექსპერტი, ჟურნალისტიკისა და მედია მენეჯმენტის კავკასიური სკოლის ასისტენტ-პროფესორი ნინო დანელია მედია ინტერაქტივების შედეგების სანდოობას კითხვის ნიშნის ქვეშ აყენებს. თუმცა, იქვე დასძენს, რომ ნებისმიერი ტელეკომპანიის ინტერაქტივის შედეგები მისი სარედაქციო პოლიტიკასა და ინტერესებს ასახავს.
"პოლიტკომერსანტთან" საუბარში ნინო დანელია, გამოცემის შეკითხვას პასუხობს ტვ "მაესტროს" ამასწინანდელი ინტერაქტივის სანდოობის შესახებ, რომლის შეკითხვის ფორმულირებაც ასეთი იყო: „ვისი მხარე უნდა დაიჭიროს საქართველომ რუსეთ-თურქეთის დაპირისპირებაში?". დასმულ შეკითხვაზე სამი პასუხი იყო მოცემული: „რუსეთს," „თურქეთს" და „ნეიტრალური". ზარის ავტორთა 80%-ზე მეტმა პასუხი - „რუსეთს" აირჩია. ინტერაქტივის შედეგებს საზოგადოების აღშფოთებული ნაწილი „ფეისბუქში" აქტიურად განიხილავდა, გამოთქვამდნენ ეჭვებს შედეგების სანდოობასთან დაკავშირებითაც:
„ცალსახად შემიძლია იმის თქმა, რომ „მაესტრო" აშკარად პრორუსული ტელეკომპანიაა, რომელიც ანტიდასავლურ განწყობასა და შესაბამისად, პრორუსულ განწყობებს ამკვიდრებს... სხვათაშორის, ინტერაქტივში გამოყენებული შეკითხვა „მაესტრომ" კოკა ყანდიაშვილის „ფეისბუქიდან" აიღო, სადაც მან ეს შეკითხვა დასვა. ზოგადად, კოკა ყანდიაშვილი ყოველთვის იქ არის, სადაც კრემლის კურანტები რეკს. აქედან გამომდინარე, ეჭვი არ მეპარება, რომ „მაესტროს" მაყურებელი ამგვარ პოზიციაზე შეიძლება ძალიან კომფორტულად იყოს", - ამბობს ნინო დანელია.