საქართველოს პარლამენტის თავმჯდომარე დავით უსუფაშვილი აცხადებს, რომ პოლიტიკური ოპონენტის დამარცხების სურვილი არ უნდა გადაიზარდოს მისი ყოვლისშემძლეობის მტკიცებაში. ამის სესახებ უსუფაშვილმა "მაესტროს ცხრიანში" განაცხადა.
უსუფაშვილის მტკიცებით, რომელიმე პარტიის გაქრობის მცდელობა გინდაც ხელკეტით, გინდაც კანონის არასწორი გამოყენებითა და გულზე მჯიღის ცემით, მხოლოდ იმ პარტიას აძლიერებს:
"თუ ჩვენ მიზნად დავისახავთ რომელიმე პოლიტიკური პარტიის – "ნაციონალური მოძრაობის" ან თუნდაც "რესპუბლიკური პარტიის" გაქრობას, პოლიტიკურად "რესპუბლიკურ პარტიას" ეს მხოლოდ აძლიერებს. ამიტომ მივმართავ ყველას, ვინც "რესპუბლიკური პარტიის" განადგურებით არის დაკავებული, გააგრძელეთ.
ეს არის პოლიტიკის კანონი. თუ გინდა პოლიტიკური ოპონენტის დამარცხება, ის არ უნდა აქციო მნიშვნელოვან მოვლენად, მას არ უნდა მიაწერო იმის კეთებაც კი, რაც არც კი დასიზმრებია, რომ ყველაფერს ის აკონტროლებს, რომ ყოვლისშემძლეა.
ბოლოს და ბოლოს, ხალხი გიყურებს და ფიქრობს, კი მაგრამ, თუ ის არის ყოვლისშემძლე, შენთან რა მინდა, იმასთან მივდივარ", - განაცხადა დავით უსუფაშვილმა.
