2014-12-03 10:31

ექსპერტი, ბიძინა ივანიშვილთან დაახლოებული პირი და ერთ დროს მისი მრჩეველი, საზოგადოების ნაწილის მიერ „რუხ კარდინალად“ მიჩნეული გია ხუხაშვილი ამბობს, რომ მისი ნებისთ საკითხის გადაწყვეტის შემთხვევაში პრემიერის ვიზიტს უკრაინაში გადადებდა სიტუაციის გარკვევამდე.

ამავე დროს, ხუხაშვილს მიაჩნია, რომ ეკა ზღულაძე საქართველოში პოლიციური რეჟიმის დამყარებაში მონაწილეობდა და მისი შესაძლო დანიშვნა უკრაინაში დემარშია.

„საპოლიციო სისტემის ჩამოყალიბებაზე მინიმუმ პოლიტიკური პასუხისმგებლობა ამ ქალბატონს ეკუთვნის. აქედან გამომდინარე, შეიძლება, სისხლის სამართლებრივი დევნა არ ხორციელდება, მაგრამ მისი პოლიტიკური მომავალი ამ თუ სხვა ქვეყანაში ჩვენთვის სულერთი არ არის. აქედან გამომდინარე, მისი დანიშვნა გარკვეული დემარშია. მისი მინისტრი, ვისი მოადგილეც ის იყო, დღეს ციხეში ზის და არაერთი ბრალდებით"..

„არ მგონია, რომ ისინი ჩვენ შიდა სიტუაციაში ვერ ერკვეოდნენ და ვერ ხვდებოდნენ, თუ რამდენად მტკივნეულად შეიძლება იყოს ეს საქართველოში აღქმული. მიუხედავად იმისა, რომ ჩვენ უნდა ვიმეგობროთ და ერთიანი სტრატეგია გვაქვს, მე  პრემიერის ვიზიტს დროებით, სიტუაციის გარკვევამდე გავაჩერებდი და ამას ოფიციალურად გამოვცხადებდი",- განაცხადა გია ხუხაშვილმა ტვ „იმედის“ ეთერში.