„სამართალდამცველთა დაცვის ლიგის“ წარმომადგენელმა და ყოფილმა პოლიციელმა ირაკლი ფირცხალავამ კოდორის ხეობაში ედუარდ შევარდნაძის მმართველობის დროს მომხდარ იმ გაუხმაურებელი კრიმინალური შემთხვევების დეტალებზე ისაუბრა, რის გამოც იქ სპეცოპერაციის ჩატარება აუცილებელი გახდა.
სპეცოპერაციის ჩატარების მიზანშეწონილობამ და ზოგადად, ემზარ კვიციანის საკითხმა „რეაქციაში“ მწვავე კამათი გამოიწვია.
„გიზო წიფიანის დედის სახლს ღამე ცეცხლი გაუხსნეს და დაიღუპა ქალბატონი და წიფიანის ბიძა. ვიცე-პოლკოვნიკ გოჩა აფრასიძის ძმა მოკლეს შეიარაღებულმა ადამიანებმა, შემდეგ გახსნილი ხელყუმბარები დაადეს და ისე ააფეთქეს. სოფელ აჟარაში პოლიციის ქვეგანყოფილება იყო, რომელსაც „მონადირის“ წევრებმა სამჯერ შეუთვალეს, დაეტოვებინათ ხეობა. იცით, რომ 2006 წლამდე არც ერთ ექსპერტს, არც ერთ პროკურორს ფეხი არ აქვს დადგმული გამოძიების მხრივ კოდორის ხეობაში?
1998 წელს პოლიციელი ბესარიონ მესხი დემონსტრაციულად მოკლეს პოლიციის განყოფილების წინ, შემდეგ მთელი პოლიცია გამოიყვანეს, ცემეს და ხეობიდან გამოყარეს, ამის შემდეგ ცხენზე ამხედრებულები შევიდნენ პოლიციის განყოფილებაში და მიანგრ-მოანგრიეს იქაურობა. ამის შემდეგ ხეობაში პოლიციას არ უფუნქციონირებია.
ასი მკვლელობაა და ვერც ერთს ვერ გამოვიძიებთ, რადგან არც ერთ გვამს ექსპერტიზა არ ჩასტარებია, არც ერთი ჰილზა, ტყვიის გულა არ არის ამოღებული. აფხაზეთის მთავრობა ჩაფრინდა, შს მინისტრი და 15 კაცი გაიტაცეს. შს მინისტრი და პროკურორი ცემით გახეთქეს, ბოსელში დააბეს და მძევლებად ჰყავდათ. არავის არ გამოუძიებია ეს საქმე. ეს იყო წინაპირობა 2006 წლის სპეცოპერაციის და არ დაგავიწყდეთ იქ მყოფი ძებნილებიც“,- განაცხადა ირაკლი ფირცხალავამ გადაცემის მსვლელობის დროს.
