2014-10-29 04:31

"ფეისბუქზე" გვერდის "ცხოველთა მეგობრები / Animals Friends" ადმინისტრაციამ გაავრცელა ვიდეო, რომელიც რუსთავში, მეგობრობის 10-ში მდებარე მაღაზია "ჯეობიტის" გარე სათვალთვალო კამერამ გადაიღო. მასზე ცანს, როგორ აგდებს სამი მამაკაცი დედა ძაღლს, რომელსაც იქვე ჰქონდა მოწყობილი თავშესაფარი, ხოლო შემდეგ სასტიკად უსწორდება ლეკვს.

როგორც ირკვევა, დედა ძაღლი, რომელმაც ლეკვები დაყარა, "ჯეობიტის" მიმდებარე ტერიტორიას შეეკედლა, ხოლო თანამშრონლები დედა-შვილს უვლიდნენ. ერთ დილასაც მათ თავშესაფრის მიმდებარე ტერიტორია სისხლით დახვდათ მოსვრილი, რის შემდეგაც კამერის ჩანაწერები ამოიღეს და მომხდარის შესახებ ზემოთხსენებულ გვერდს შეატყობინეს, ხოლო გვერდი პროკურატურას დაუკავშირდა.

მომხდართან დაკავშირებით დაწყებულია გამოიძიება, უკვე დადგინდა ვიდეოზე აღბეჭდილი მამაკაცების ვინაობა და ისინი დაკითხეს კიდეც. როგორც გვერდზე აღწერილ ინფორმაციაშია ნათქვამი, პროკურატურაში განაცხადეს, რომ ისინი კანონის შესაბამისად დაისჯებიან.

საქართველოს სისხლის სამართლის კოდექსის მიხედვით, ცხოველებისადმი სასტიკი მოპყრობა დანაშაულებრივი ქმედებაა. კოდექსის 259-ე მუხლის თანახმად:

“1. ცხოველისადმი სასტიკი მოპყრობა, რამაც მისი დაღუპვა ან დასახიჩრება გამოიწვია, აგრეთვე ცხოველის წვალება, ისჯება ჯარიმით ან გამასწორებელი სამუშაოთი ვადით ერთ წლამდე.

2. იგივე ქმედება, ჩადენილი: (ა) ჯგუფურად; (ბ) არაერთგზის; (გ) მცირეწლოვნის თანდასწრებით, ისჯება ჯარიმით ან თავისუფლების აღკვეთით ვადით ორ წლამდე.“