2014-10-28 17:10

მწერალი ლელა კოდალაშვილი "კვირასთან" საუბარში ამბობს, რომ მან შავკანიანი, ასფალტზე დავარდნილი მამაკაცი მართლაც დაინახა, მაგრამ ავტობუსიდან მისი გაგდების ფაქტს არ შესწრებია. კოდალაშვილის თქმით, დასკვნები მან დამოუკიდებლად გამოიტანა და განავრცო და ის თავად მამაკაცის ნაამბობს ეფუძნებოდა.

„შავკანიანი მამაკაცი ავტობუსის გაჩერებიდან დაახლოებით 20-30 მეტრის მოშორებით ასფალტზე ეგდო და ცხვირიდან სისხლი მოსდიოდა, მივედი და ინგლისურ ენაზე დაველაპარაკე, ხელსახოცები და “კორსიზი” მივეცი. ასევე სასწრაფო დახმარების და პატრულის გამოძახება შევთავაზე, თუმცა უარი მივიღე. იმდენად აღელვებული ვიყავი მისი მდგომარეობით, არ მიკითხავს, როგორ აღმოჩნდა იმ ვითარებაში.

მხოლოდ ის მითხრა, რომ ფრანგი იყო. გამვლელების გულგრილმა დამოკიდებულებამ გამაოცა, ერთ-ერთმა გამვლელმა ქალბატონმა თქვა ისიც, რომ შესაძლოა, მას ებოლაც ჰქონოდა. მის მიმართ დისკრიმინაციული შეძახილებიც გაისმოდა. ძალიან აღელვებული დავბრუნდი სახლში, ფეისბუქის საშუალებით გავრცელებულ ინფორმაციაში გამოვთქვი ჩემი ვარაუდები და დასკვნები.

მე ამ გარემოებებიდან დავასკვენი, რომ ეს მამაკაცი ავტობუსიდან სწორედ ამ მიზეზით ჩამოაგდეს, რომ ებოლათი დავირუსების შეეშინდათ. მე მისთვის არ მიკითხავს, თუ როგორ აღმოჩნდა ძირს. არც იმას გამოვრიცხავ, რომ ვიღაცამ უბრალოდ ხელი ჰკრა და არც იმას, რომ ეს მამაკაცი უხერხულად იდგა და ჩამოვარდა.

მეც მქონდა ასეთი შემთხვევა, მაღალქუსლიანი ფეხსაცმელი მეცვა, ავტობუსით ვმგზავრობდი, ფეხი უხერხულად დავადგი გადმოვვარდი და ასფალტზე დავეცი. ჩემი ვარაუდი კი დავწერე იმიტომ, რომ ეს არის ჩემი პირადი გვერდი. მე ვარ მწერალი და მქონდა უფლება, შინაარსი მხატვრულად გამევრცო.

ჩვენს ქვეყანაში ფერადკანიანებს ცუდად უყურებენ. ჩემს მეგობარს ჰყავს ფერადკანიანი ბოიფრენდი, რომელზეც ყოველ ფეხის ნაბიჯზე ეკითხებიან, რატომ ცხოვრობს მასთან. მე მწერალი ვარ და ჩემს პოსტში ლიტერატურულად გავმართე გამვლელთა რეაქციები, ჩემს ტესტებს პასუხისმგებლობით ვეკიდები. შინაარსი იგივე დავტოვე, უფრო გავამხატვრულე წინადადებები“,-განაცხადა კოდალაშვილმა.