2020-03-19 16:03

გვაქვს დაახლოებით 2000 საკარანტინო ადგილი და საჭიროების შემთხვევაში, შეგვიძლია, გავაორმაგოთ ეს რაოდენობა, - ამის შესახებ ჟურნალისტებს ეკონომიკისა და მდგრადი განვითარების მინისტრმა, ნათია თურნავამ განუცხადა.

„საკარანტინო ადგილების ნაწილი არის დაკავებული, ნაწილი ივსება. განსაკუთრებით მნიშვნელოვანია, რომ ჩვენი თანამოქალაქეები პერიოდულად ჩამოსაყვანი არიან ევროპის სხვადასხვა ქალაქიდან, ამას ემსახურება „აირზენა“ და ჩვენ ვეხმარებით, უნდა დავხვდეთ ამ მოქალაქეებს გამზადებული თავისუფალი საკარანტინო სივრცეებით. ამ კუთხით ჩვენ გვაქვს სრული მზადყოფნა. სხვადასხვა სასტუმროში სხვადასხვა თანხა ჯდება, გააჩნია თვითღირებულებას, ღირებულებაც შეიძლება იყოს ცოტა განსხვავებული, მაგრამ მინდა ვთქვა, რომ ყველა სასტუმრო იჩენს მაქსიმალურად სოციალურ პასუხისმგებლობას. არ გვაქვს საქმე განსაკუთრებით გაზრდილ თანხებთან, მაგრამ მინდა ვთქვა, რომ ბიუჯეტი დღეს არის გადაწყობილი მთლიანად ამ ახალ პრიორიტეტზე, რაც არის მოსახლეობის დაცვა კორონავირუსის ინფექციის შემდგომი გავრცელებისაგან. მთავარ აქცენტს ვაკეთებთ პრევენციაზე, აქედან გამომდინარე, ჩვენ ამ მიმართულებით რაც იქნება საჭირო, ყოველთვის გავიღებთ თანხებს“, - განაცხადა ნათია თურნავამ.