2020-03-13 21:05

სწრაფი ტესტით დროულად იდენტიფიცირებული პაციენტის იზოლაცია და ასევე სტაციონარში მოთავსება, ექიმებს პაციენტების მკურნალობას გაუადვილებს, - ამის შესახებ ჯანდაცვის მინისტრმა, ეკატერინე ტიკარაძემ „ქრონიკაში“ განაცხადა.

მინისტრის განმარტებით, ჩინეთის მიერ სწრაფი ტესტების გადმოცემა, დაავადებათა კონტროლის ცენტრისა და ჯანდაცვის სამინისტროსთვის მნიშვნელოვანი ინსტრუმენტია, გამომდინარე იქიდან, რომ გარკვეულად ეს პრევენციული ღონისძიებაა იმის სწრაფად აღმოსაჩენად, ვინ შეიძლება იყოს პოტენციურად კორონავირუსით დაავადებული პაციენტი, რათა დროულად მოხდეს ამ ადამიანის თვითიზოლაცია.

„რომ არა ჩვენი მოქალაქის ნაკლები სოციალური პასუხისმგებლობა, მაშინ კორონავირუსით დაავადებულთა რიცხვი იქნებოდა არა 25, არამედ - 10.

ძალიან ვწუხვარ, რომ ეს მოვლენა ასე განვითარდა და ჩვენ ვერ მოვახდინეთ ამ ადამიანის საზღვარზე იდენტიფიცირება. ჩვენ, როგორც ჯანდაცვის სამინისტრო, ასევე დაავადებათა კონტროლის ცენტრი და ყველა რიგითი თანამშრომელი იღებს საკუთარ თავზე ამ პასუხისმგებლობას.

ამან მოგვცა ჩვენ იმის ნიშანი, რომ საზღვარზე უფრო დეტალურად უნდა იყოს გამოკვლეული თითოეული მგზავრი, რათა მსგავს შედეგთან არ მივიდეთ და ეს რიცხვი გეომეტრიული პროგრესით არ გაიზარდოს“, - განაცხადა ეკატერინე ტიკარაძემ.