საზოგადოებამ გრიპის მიმართ ყურადღება არ უნდა მოადუნოს, - ამის შესახებ ბრიფინგზე დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ განაცხადა. მისი თქმით, მარტის მეორე კვირაში გრიპის გამო მიმართვიანობა ოდნავ გაიზარდა, ამ დაავადებისგან დასაცავად კი მოსახლეობამ იგივე რეკომედაციები უნდა გაითვალისწინოს, რომლებსაც კორონავირუსის თავიდან ასარიდებლად ასრულებს.
„არ უნდა მოვადუნოთ ყურადღება გრიპთან მიმართებაში. ახლა ჩვენ გვაქვს გარკვეული ზედდება ამ ორი რესპირატორული ინფექციის. მარტის მეორე კვირაში, უკვე გვაქვს ოდნავ, არ შეგეშინდეთ, მაგრამ სიფხიზლე აუცილებელია,გვაქვს ოდნავ ზრდა მიმართვიანობის გრიპის და გრიპის მსგავსი დაავადებების ქვეყანაში 100 ათას მოსახლეზე გადათვლით და ასევე მძიმე მწვავე რესპირაციული ინფექციებით ჰოსპიტალიზაციის მაჩვენებლები კლინიკებში. რა თქმა უნდა, ეს არის 2-4%-ის ფარგლებში, მაგრამ ეს მაინც საყურადღებოა. უნდა ვიყოთ ფრთხილად, რომ ჩვენ მეორე ძლიერი ტალღა გრიპის არ მივიღოთ ქვეყანაში. ამიტომ ყველა ის რეკომენდაცია, რომელსაც ჩვენ კორონაზე ვიძლევით ახლა ვრცელდება იგივე გრიპზე - დიდი თავშეყრის ადგილების თავის არიდება, პირბადეების მიფარება თუ ეს საჭიროა, შესაბამისი დამცავი საშუალებების ხმარება, ხელების ხშირი დაბანა“, - განაცხადა გამყრელიძემ.
