-
2015-10-28 15:08
"პირველი რადიო" ქიბარ ხალვაში-"რუსთავი-2"-ის საქმეზე მოსარჩელე მხარის ერთადერთი მოწმის შესახებ სკანდალურ ინფორმაციას აქვეყნებს და წერს, რომ ექსპერტი შალვა ივანაშვილი, რომელმაც 2006 წლის მდგომარეობით ტელეკომპანიის მდგომარეობა შეაფასა, 2012 წლის ივნისში მოსახლეობისთვის „გლობალ ტვ“-ს ანტენების დამონტაჟების საქმეში ექსპერტთა ჯგუფის წევრი იყო.
2012 წლის ივნისში გამართულ სასამართლო პროცესზე ბიძინა ივანიშვილის ადვოკატი შალვა თადუმაძე სწორედ ივანაშვილის და მეორე ექსპერტის, გიორგი ჩადუნელის დაკითხვას ითხოვდა. როგორც მაშინ თადუმაძე აცხადებდა, ივანაშვილის მიერ მომზადებულ დასკვნაში, ფინანსური ცნებები ბუნდოვანი იყო.
შოთა ივანაშვილის მომზადებულ დასკვნაში ეწერა, რომ „გლობალ ტვ“-ის ბიზნეს გეგმა სატელიტური ანტენების განვადებით დამონტაჟებასთან დაკავშირებით, არ შეიძლება ყოფილიყო მომგებიანი. „გლობალ ტვ“-ის გარდა, ექსპერტ ივანაშვილის და ჩადუნელის, ასევე ექსპერტ დავით ამაშუკელის ხელმოწერა ბიძინა ივანიშვილის კუთვნილ „ქართუ ჯგუფზე“ მომზადებულ დასკვნაზეა.
მაშინდელი ოპოზიციისთვის ივანაშვილის და ჩადუნელის მომზადებული დასკვნები სადაო იყო და ადვოკატები აცხადებდნენ, რომ მათ მიერ გაკეთებულ დასკვნებში ფინანსური ცნებები ბუნდოვანი იყო. სწორედ ამ დასკვნების საფუძვლეზე ბიძინა ივანიშვილის კომპანიებს ბიუჯეტის სასარგებლოდ ჯარიმები უნდა გადაეხადათ. როგორც ცნობილია „რუსთავი 2“-ი ს ადვოკატებმა დღეს შოთა ივანაშვილს „გლობალ ტვ“-ი ს და „ქართუ ჯგუფის“ საქმეები შეახსენეს, თუმცა მოსამართლე ურთმელიძემ შეკითხვა პოლიტიკურად ჩათვალა და მოხსნა.
საინტერესოა ის გარემოება, რომ გავრცელებული ინფორმაციით, ივანაშვილი ხელისუფლების ცვლილების შემდეგ „გლობალ ტვ“-ისთან და „ქართუ ჯგუფთან“ დაკავშირებული საქმეების ძიებაში არსად ფიგურირებს, თუმცა მას ოპოზიციაში ყოფნისას დღევანდელი ხელისუფლების წარმომადგენლები „ზონდერ ექსპერტად“ მოიხსენიებდნენ. შეგახსენებთ, რომ ექსპერტი შოთა ივანაშვილი ქიბარ ხალვაშის ერთადერთი მოწმეა.
"პირველი რადიო"