საქართველოს ფეხბურთის ფედერაციის ყრილობაზე ფარული კენჭისყრით გადაწყდა, რომ რაჭა-ლეჩხუმ ქვემო სვანეთისა და გურიის დელეგატები, რომელთაც საარჩევნო ხმის უფლება სფფ-ს აღმასკომმა დაუდგინა, პრეზიდენტის არჩევნებში მონაწილეობას ვერ მიიღებენ.
33 დელეგატიდან 17-მა გადაწყვიტა, რომ ებრალიძესა და შარაბიძეს ხმის უფლება არ უნდა ჰქონდეთ. ერთი ბიულეტენი ბათილად გამოცხადდა. ასე რომ, საბოლოო გადაწყვეტილებით, სფფ-ს პრეზიდენტს თავდაპირველად დაგეგმილი 35-ის ნაცვლად 33 დელეგატი აირჩევს. პრეზიდენტად არჩევისთვის 17 ხმა, ანუ უმრავლესობა, საკმარისია. წინასწარი ინფორმაციით, ორივე დელეგატი, რომელსაც ხმის უფლება გააუუქმდათ, რეზი არველაძის მხარდამჭერები იყვნენ.
სფფ-ს პრეზიდენტის ასარჩევად ფარული კენჭისყრა რამდენიმე წუთში დაიწყება. სავარაუდოდ, ხმები სამი კანდიდატიდან ორზე: რევაზ არველაძესა და ლევან კობიაშვილს შორის განაწილდება. აქამდე არსებული სტატუს-ქვოს მიხედვით, 35-დან 18 ხმა რეზი არველაძის მხარდამჭერებს ეკუთვნოდათ, ხოლო მას შემდეგ, რაც დელეგატთა რაოდენობა 33-დე ჩამოვიდა, არველაძის მხარდამჭერები 16 დარჩნენ, ხოლო კობიაშვილის - 17, თუმცა, ეს მხოლოდ წინასწარი მოცემულობაა და ვის მისცემს ხმას, დელეგატმა უშუალოდ ბიულეტენში სათანადო გვარის შემოხაზვით უნდა გადაწყვიტოს.
