თავდაცვის ყოფილი მინისტრის ბაჩო ახალაიას მეუღლე, ანი ნადარეიშვილი სოციალურ ქსელში ორი ოჯახის პრობლემაზე წერს, რომელთაც ქუჩაში დარჩენა ემუქრებათ.
„მეგობრებოოო!!! ძალიან მძიმე შემთხვევასთან გვაქვს საქმე.
ორ ოჯახს, რომელთაგან ერთი დამსახურებული სამხედროს, 2008 წლის ომის გმირის ამირან ცერცვაძის ოჯახია, ხოლო მეორე სოციალურად დაუცველი უსინათლოთა კავშირის წევრი, მრავალშვილიანი ავთანდილ ლომიძის ოჯახია, სახელმწიფო ასახლებს ბინებიდან, რომელიც მათ თავდაცვის სამინისტრომ გადასცა 2009 წელს, ხოლო ამ ბინებს გადასცემენ ძმებ ლაზარე და ავთანდილ ჯორბენაძეებს (ეს უკანასკნელი შევარდნაძის ხელისუფლების მაღალჩინოსანი იყო).
მე, როგორც ერთი რიგითი მოქალაქე, რომელიც ვალში ვარ ისევე როგორც ყველა ქართველი, გმირ მაიორ ამირან ცერცვაძის წინაშე, ყველაფერს გავაკეთებ იმისთვის, რომ არ დავუშვა ეს ჩვენი ქვეყნისთვის სამარცხვინო ფაქტი და გთხოვთ ყველას დამიდგეთ გვერდში, არ დავტოვოთ ჩვენი გმირის და სოციალურად დაუცველი უსინათლოს ოჯახები ქუჩაში!!!
მაიორი ამირან ცერცვაძე - ბატალიონის ყოფილი მეთაური რომელმაც მთელი ცხოვრება შესწირა არმიას (თანამდებობიდან გათავისუფლებული პოლიტიკური ნიშნით), 2008 წლის რუსეთ-საქართველოს ომის დროს მიღებული აქვს მრავლობითი ჭრილობები, ასევე 2-ჯერ მიღებული აქვს მონაწილეობა ერაყში სამშვიდობო ოპერაციებში, დაჯილდოებულია:
ვახტანგ გორგასლის II ხარისხის ორდენით, ღირსების ორდენით, მედალი „მხედრული მამაცობისთვის“, მედალი „სამშობლოსათვის თავდადებული“, მედალი „გენერალი მაზნიაშვილი“, მედალი „გენერალი კვინიტაძე“, მედალი „საბრძოლო იარისთვის“, მედალი „საქართველოს შეიარაღებული ძალების რიგებში უმწიკვლო სამსახურისთვის“ (I ხარისხი), მედალი „საქართველოს შეიარაღებული ძალების რიგებში უმწიკვლო სამსახურისთვის“ (II ხარისხი), მედალი „საქართველოს შეიარაღებული ძალების რიგებში უმწიკვლო სამსახურისთვის“ (III ხარისხი), მიღებული აქვს უამრავი ადგილობრივი და საერთაშორისო სიგელი და სერტიფიკატი“, - წერს ანი ნადარეიშვილი.
