2014-12-28 21:06

„სამართალდამცავთა დაცვის ლიგა“ ბათუმში პოლიციელის მკვლელობასთან დაკავშირებით განცხადებას ავრცელებს, რომელსაც "აფხაზეთის ხმა" გთავაზობთ:

„სამართალდამცავთა დაცვის ლიგა“ ღრმა მწუხარებას გამოთქვამს, 2014 წლის 27 დეკემბერს, ბათუმში, პოლიციის ოფიცრის - თარაშ მუკბანიანის გარდაცვალების გამო. ვუსამძიმრებთ გარდაცვლილის ოჯახის წევრებს, ახლობლებსა და კოლეგებს.

ჩვენთვის ცნობილია, რომ პოლიციელის განზრახ მკვლელობაში ბრალდებული რამაზ.დ 2014 წლის 26 მაისს, წარსულში სწორედ პოლიციისთვის წინააღმდეგობის გაწევის ფაქტზე იყო დაკავებული. რამაზ დ.-მ 22 წლის თარაშ მუკბანიანს სასიკვდილო ჭრილობა, ცეცხლსასროლი იარაღით თავის არეში მიაყენა, შემდეგ კი წაქცეულ პოლიციელს ფიზიკურად გაუსწორდა. ბრალდებულმა ცეცხლნასროლი ჭრილობები კიდევ სამ პირს მიაყენა, დაზარალებულთა შორის ორი თურქეთის მოქალაქეა.

აღიშნულიდან გამომდინარე, „სამართალდამცავთა დაცვის ლიგა“ მიიჩნევს, რომ აუცილებელია საზოგადოებაში პოლიციელთა ავტორიტეტის ამაღლება, რაშიც საზოგადოების თითოეულმა წევრმა უნდა მიიღოს აქტიური მონაწილეობა, რადგან სწორედ თითოეული პოლიციელი უზრუნველყოფს სახელმწიფოსა და მოქალაქეთა სიმშვიდეს.

განსაკუთრებული სისასტიკით მოკლული პოლიციელის მკვლელობიდან ორი დღე გავიდა, თუმცა არ გვსმენია საზოგადოების პროტესტი. გვაინტერესებს სად არიან აღშფოთებული საზოგადოების წარმომადგენლები, საზოგადო მოღვაწეები?

შექმნილი ვითარებიდან გამომდინარე საქართველოს მოსახლეობისათვის დამნაშავეთა სამყაროს წევრების მიერ პოლიციელის მკვლელობა ჩვეულებრივი ფაქტია, ხოლო სპეცოპერაციის დროს შემთხვევის ადგილზე სამართალდამცველებისათვის შეაირაღებული წინააღმდეგობის გაწევის დროს დამნაშავის ლიკვიდირება მიუღებელი.

მოკლულ პოლიციელს, მეუღლე და ორი მცირეწლოვანი შვილი დარჩა.

დაღუპული პოლიციელები

წარმოგიდგენთ სამსახურეობრივი მოვალეობის შესრულების დროს დაღუპული პოლიციელების არასრულ სიას: გიორგი ყიზილაშვილი ; ზურაბ ქვლივიძე; მამუკა გოგოლაძე; ზურაბ მალანია; ირაკლი ქუთათელაძე; ზურაბ მანსურაშვილი; დავით კვანტალიანი; გივი აფციაური; დავით დემურია; ენვერ გუსოევი; გურამ თოფჩიშვილი; ზვიად კახაძე; იასონ კულუმბელაშვილი; თამაზ პატარიძე; ალექსანდრე კეკენაძე; თამაზ ჯანაშია; რაულ ბერიძე; გიორგი თექთუმანიშვილი; გელა კაკუბერია; ილია ლომსაძე; სილიბისტრო არჩვაძე; ლევან ნანდოშვილი; მანუჩარ ქორიშვილი; რამაზ დევიძე; გოჩა ომსარაშვილი.