პერსონალურ მონაცემთა დაცვის ინსპექტორის მოადგილის, ნიკა ბრეგვაძის თქმით, 1-ლი ნოემბრიდან დღემდე ორგანიზაციას სარეკლამო „ესემესებით“ შეწუხებულმა 4-მა მოქალაქემ მიმართა.
შესაბამისად, დაწყებულია საქმის წარმოება 6 კომპანიის მიმართ ამ განცხადებების ფარგლებში.
„შევისწავლეთ სხვა სხვადასხვა გარემოებები, მოქალაქეებმა განცხადებებს დაურთეს სხვადასხვა სახის მტკიცებულებები, „სქრინშოტების“ სახით, სადაც აღნიშნავდნენ, რომ ზოგან არ იყო უარის თქმის ფუნქცია დამატებული, რომ უარის შემთხვევაში ამ ნომერზე რეკლამა აღარ გაეგზავნათ, ზოგმა მიუთითა, რომ მისი ტელეფონის ნომრები არ იყო მისივე თანხმობით გაცემული და ა.შ.
ანუ შინაარსობრივად რამდენიმე პრობლემა დაფიქსირდა. შემოწმდა ამ 6 კომპანიიდან რამდენიმე, ხარვეზები გამოვლინდა და თითქმის ყველა მათგანი ამჟღავნებს თანამშრომლობის სურვილს.
ყველას სურს, ეს საკითხი მალე მოწესრიგდეს, რადგან სანქციებიც საკმაოდ დიდია და რეპუტაციის საკითხებსაც ითვალისწინებენ, არ სურთ, ნეგატიური ტალღის ქვეშ მოყვნენ მათი კომპანიები. კანონი პერსონალურ მონაცემთა დაცვის შესახებ ამბობს, რომ ვის ინტერესებსაც ემსახურება სარეკლამო „ესემესი“, ის არის პასუხისმგებელი. ანუ თუ თქვენ საბურავებისა და კოსმეტოლოგის ცენტრიდან მოგივათ მესიჯები, მათ ეკისრებათ პასუხისმგებლობა.
პირველ ეტაპზე ჯარიმა არის 3 ათასი ლარი და შემდგომ ეტაპზე 10 000 ლარი. როცა პროცესი დასრულდება, მოხდება დაჯარიმებაც.
თანხა წავა პირდაპირ ბიუჯეტში, რეკვიზიტების მეშვეობით, ყოველგვარი შუამავლის გარეშე.
ვინც იქნება სანქციადადებული პირი, ვალდებული იქნება, თანხა გადარიცხოს სახელმწიფო ბიუჯეტში“, - აღნიშნა ბრეგვაძემ.
„ალია“
