2014-11-19 12:49

საქართველოს პრემიერ მინისტრმა ირაკლი ღარიბაშვილმა ჩქაროსნული ავტომაგისტრალის ქუთაისის 32 კმ-იან შემოვლითი გზა გახსნა. ღარიბაშვილის განცხადებით, გზის მშენებლობა მაღალი ხარისხით არის შესრულებული.

,,ეს არის ძალიან მნიშვნელოვანი გზის მონაკვეთი. მაშინ როდესაც, წინა ხელისუფლების დროს რვა წლის მანძილზე მოხდა მხოლოდ 70 კმ-იანი ავტომაგისტრალის მშენებლობა, მინისტრმა შავლიაშვილმა და მისმა გუნდმა ორ წელიწადში შეძლო 55 კმ-იანი მაგისტრალის მშენებლობა. ეს არის რეალური შედეგი, რითაც ჩვენ ნამდვილად ვამაყობთ,” – განაცხადა ღარიბაშვილმა.

საქართველოს რეგიონული განვითარების და ინფრასტრუქტურის მინისტრის, დავით შავლიაშვილის განცადებით, ამ მასშტაბის საგზაო მონაკვეთი ჩქაროსნულ მაგისტრალზე ამ დრომდე არასოდეს გახსნილა.
“ეს არის მაღალი ხარისხის უსაფრთხო გზა, რომელსაც ევროპისკენ მივყავართ,” – განაცხადა შავლიაშვილმა.

32-კმ-იანი მონაკვეთი ქუთაისს სატრანზიტო ნაკადისგან განტვირთავს, ხოლო მგზავრობის ხანგრძლივობას 30 წუთით შეამცირებს. შესრულებული სამუშაოების ღირებულება 181 მლნ ლარი შეადგინა.