2014-11-18 14:41

ექსპერტი მამუკა არეშიძე ემზარ კვიციანისთვის 12-წლიანი სასჯელის შეფარდებას  არასამართლიანად მიიჩნევს.

„ემზარ კვიციანმა, რომელმაც ამდენი იბრძოლა საქართველოს ტერიტორიული მთლიანობისთვის, რომ შეენარჩუნებინა კოდორი, მას 12-წლიანი სასჯელი მისცეს.

ის, რაც მან გააკეთა პირველივე ბრძოლებში 1995 წელს ლაცას გვირაბებთან და შემდეგში, ამის დავიწყება არ შემიძლია. ის, რომ კვიციანს გული მისცემოდა და ქვეყანაში სიმართლის დასადგენად ჩამოსულიყო, ეს დასაძრახია?!

სულ რომ არავისთან არ ყოფილიყო მოლაპარაკებული, თუმცა, ვიცი, რომ ნამდვილად ჰქონდა წინასწარი საუბრები და ისინი ანუგეშებდნენ, ჩამოდი, ხელს არავინ დაგაკარებსო. კონკრეტულად მისცეს თუ არა პირობა ხელშეუხებლობაზე, ეგ უკვე არ ვიცი.

შეიძლება გაჩნდეს კითხვები როგორც ალასანიას მიმართ, ასევე სხვების მიმართაც. რაც შეეხება კონკრეტულ პირებს, ვისაც კვიციანი ადანაშაულებს, ალასანია იქნება ეს თუ სხვა, ალასანია იმ პერიოდში იყო თანამდებობის პირი. ის კურირებდა ამ მიმართულებას და მე არ გამოვრიცხავ, რომ ალასანიამ საბედისწერო ბრძანება შეასრულა.

თუ კვიციანს დავუჯერებთ, რომ ალასანიამ შეასრულა არასწორი ბრძანება, მაშინ მას ამისთვის უნდა მოეთხოვოს პასუხი და მანაც, როგორც პოლიტიკურმა ფიგურამ, პასუხი უნდა გასცეს“, - აცხადებს მამუკა არეშიძე.

 „ალია“