2014-11-15 01:01

სოფლის მეურნეობის მინისტრის მოადგილე ნაცემია და საავადმყოფოში გადაიყვანეს. ამის შესახებ "რეაქციის" წამყვანმა ინგა გრიგოლიამ გადაცემის ბოლოს განაცხადა.

"მომაწოდეს ინფორმაცია, რომ ნაცემია სოფლის მეურნეობის მინისტრის მოადგილე, რომელიც კლინიკაშია გადაყვანილი"- განაცხადა ჟურნალისტმა. ამასთან, მას არ დაუკონკრეტებია, რომელ მოადგილესთან დაკავშირებით მიიღო ინფორმაცია. 

სოფლის მეურნეობის მინისტრს ხუთი მოადგილე ჰყავს - ნოდარ კერესელიძე, გოჩა ცოფურაშვილი, ლევან დავითაშვილი, დავით გალეგაშვილი და იური ნოზაძე. როგორც ირკვევა, საუბარია დავით გალეგაშვილზე, რომელიც, "ინტერპრესნიუსის" ცნობით, კომაშია და საავადმყოფოში იმყოფება. 

როგორც "ინტერპრესნიუსს" სამინისტროს პრესსამსახურში განუცხადეს, შემთხვევა გუშინ მოხდა, დავით გალეგაშვილი, წაიქცა, რის შედეგადაც თავი დაარტყა და ამჟამად კომაშია. 

"ის მთელი დღის განმავლობაში ექიმების დაკვირვების ქვეშ იმყოფება. ექიმების ინფორმაციით, მისი მდგომარეობა უმჯობესდება", - აღნიშნეს პრესსამსახურში.

ინფორმაციას, რომ დავით გალეგაშვილი ნაცემია, პრესსამსახურში კატეგორიულად უარყოფენ.