საოკუპაციო ხაზის გადმოწევა და ცხინვალის იზოლატორში მყოფი საქართველოს მოქალაქეები - ეს ის მთავარი საკითხებია, რასაც ქართული მხარე დღეს ერგნეთში გამართულ შეხვედრაზე დააყენებს.
ინციდენტების პრევენციისა და მათზე რეაგირების მექანიზმის ფარგლებში გამართულ შეხვედრას სეპარატისტების მხრიდან მურად ჯიოევი ესწრება.
შეხვედრის დაწყებამდე ჯიოევმა ეუთოს სპეციალურ წარმომადგენელს და შვეიცარიის ელჩს, გიუნტერ ბეხლერს, სთხოვა, ინციდენტების პრევენციის შეხვედრაზე დაეყენებინა საკითხი, რომელიც ე.წ. საზღვართან 200 მეტრის რადიუსში მოსახლეობას მიახლოებას აუკრძალავდა.
ჯიოევი ამბობს, რომ ხაზების დაფიქსირება ზედმეტ პრობლემებს მოხსნის.
„ნუ აწარმოებენ აქ სამეურნეო საქმიანობას. მესმის, ჩვენს შემთხვევაში 200 და 100 მეტრიც კი გადამწყვეტია ადგილობრივი მოსახლეობისთვის. რთულია, მაგრამ რატომ არ უნდა შევეცადოთ, ავუხსნათ ადგილობრივებს, რომ არ მიუახლოვდნენ და არ გადაკვეთონ ხაზი.
ხოლო იმისთვის, რომ არ გადაკვეთონ, საჭიროა დაფიქსირდეს ეს ხაზები. ამ კუთხით დიდი პასუხისმგებლობა სწორედ ინციდენტების პრევენციისა და მასზე რეაგირების ჯგუფს აკისრია, ჟენევაში ამას ვერ მივაღწევთ,“ - განაცხადა ჯიოევმა.