-
2017-05-07 20:24
ჩოხატაურში მიმდინარე საკონსტიტუციო ცვლილებების საყოველთაო-სახალხო განხილვაზე კონსტიტუციის სამართლის სპეციალისტმა ვახუშტი მენაბდემ იმ საფრთხეებზე ისაუბრა, რაც მისი თქმით, ქვეყნის პირველი პირის არაპირდაპირი არჩევის წესის დანერგვის შემთხვევაში შეიძლება გამოვლინდეს.
ვახუშტი მენაბდე მიიჩნევს, რომ ამ საარჩევნო სისტემის პირობებში გამარჯვებულ პარტიას მაღალი ალბათობით ექნება შესაძლებლობა, თავად გადაწყვიტოს ვინ იქნება პრეზიდენტი.
„არ არის ნამდვილად ტრაგედია პრეზიდენტის ირიბი წესით არჩევა, მაგრამ ამ საარჩევნო სისტემის პირობებში, როდესაც უმრავლესობას ესეთი უპირატესობა ექნება, ფაქტობრივად არჩევნებში გამარჯვებულ პარტიას მაღალი ალბათობით ექნება შესაძლებლობა, თავად გადაწყვიტოს ვინ იქნება პრეზიდენტი, ანუ ზეპარტიული პრეზიდენტი დაინიშნოს ფაქტობრივად არჩევნებში გამარჯვებული პარტიის მიერ, რაც მის ზეპარტიულობას კითხვის ნიშნის ქვეშ დააყენებს,“ - აღნიშნა ვახუშტი მენაბდემ.
კონსტიტუციონალისტმა საარჩევნო სისტემის ცვლილებაზეც გაამახვილა ყურადღება. ვახუშტი მენაბდე მიიჩნევს, რომ საქართველოში მოქმედი საარჩევნო ბარიერი დასაშვებთაგან ყველაზე მაღალია. მისივე განცხადებით, 5%-იანი ბარიერის შედეგია ის, რომ ყოველ მეხუთე მოქალაქეს წარმომადგენელი პარლამენტში არ ჰყავს.
მისივე თქმით, კონსტიტუციაში დაგეგმილი ცვლილებებით ისეთი საარჩევნო სისტემის შეთავაზება უნდა მომხდარიყო, რომელიც მაქსიმალურ წარმომადგენლობას უზრუნველყოფდა.