2017-04-20 14:19

ოპოზიციურმა პარტიებმა „ევროპულმა საქართველომ“ და „თავისუფალმა დემოკრატებმა“  სახელმწიფო საკონსტიტუციო კომისია დატოვეს.  ამის შესახებ შალვა შავგულიძემ და ირაკლი აბესაძემ ჟურნალისტებთან განაცხადეს. 

მათივე თქმით,  განცხადება კომისიის დატოვების შესახებ კანცელარიას დღეს ჩაბარდება და შემდეგ საკონსტიტუციო კომისიას გადაეგზავნება.

„საარჩევნო სისტემასთან დაკავშირებით შემოთავაზებული ვარიანტი ემსახურება არა სამართლიანი სისტემის ჩამოყალიბების მიზანს, არამედ სრულიად უსამართლოდ, დაუმსახურებელ და მეტად დიდ უპირატესობას ანიჭებს სახელისუფლებო ძალას.

საქართველოს პრეზიდენტის არჩევის წესთან და პრეზიდენტის უფლებამონიჭებებთან დაკავშირებით შემოთავაზებული ცვლილებები მიმართულია პრეზიდენტის ინსტიტუტის რეალური უფლებამოსილებებისაგან დაცლისა და მმართველი პოლიტიკური ძალის მიერ მასზე პოლიტიკური კონტროლის განზრახვას“, - ნათქვამია განცხადებაში, რომელიც შალვა შავგულიძემ ჟურნალისტებს გააცნო.

მისივე თქმით,  მთლიანობაში ცვლილებები მიმართულია სახელისუფლო ძალის ხელში სახელმწიფო ძალაუფლების გაუმართლებლად ჭარბ კონცენტრაციას, რაც დამაზიანებელი იქნება ქვეყნის დემოკრატიული მოწყობისათვის.

განცხადებაში ასევე აღნიშნულია, რომ დოკუმენტში გათვალისწინებულია მხოლოდ მმართველი პოლიტიკური ძალის მიერ კომისიის მუშაობაში გამოხატული ინიციატივები და სრულიად უგულებელყოფილია ოპოზიციური პოლიტიკური ძალების, არასამათავრობო ორგანიზაციებისა, თუ სახალხო დამცველის მოსაზრებები.

„ეს გვარწმუნებს,  რომ კომისია „ქართულმა ოცნებამ“ შექმნა არაფართო კონსესუსის შედეგად შემუშავების მიზნით, არამედ იმისათვის რომ კომისიის გადაწყვეტილების სახელით შეეფუთა ის ცვლილებები, რომელთა განხორციელებაც წინასწარ ჰქონდა გადაწყვეტილი ვიწროპარტიული ინტერესებიდან გამომდინარე. ყოველივე აქედან გამომდინარე, და ასევე იმის გამო, რომ „ქართული ოცნების“ რიცხოვნობა კომისიაში დომინანტია, კანონპროექტის ხმის მიცემის პროცედურაში მონაწილეობის შემთხვევაში შესაძლებლობა არ გვექნება გავლენა მოვახდინოთ კენჭისყრის შედეგებზე.

„ევროპული საქართველო“ და „თავისუფალი დემოკრატები“ ვტოვებთ კომისიას. პასუხისმგებლობა მთლიანად ეკისრება ამ კანონპროექტის ავტორს,  ერთადერთ პოლიტიკურ ძალას „ქართულ ოცნებას“,- ნათქვამია განცხადებაში.