-
2017-01-24 19:56
უკრაინაში დაკავებულმა ვიცე-პოლკოვნიკმა გიორგი ცერცვაძემ, რომლის რუსეთში შესაძლო ექსტრადირების საკითხი კიევის სააპელაციო სასამართლომ 26 იანვარს უნდა განიხილოს, საქართველოში მის მხარდამჭერებს მადლობის წერილი გამოუგზავნა.
„დიდი მადლობა ყველა იმ ადამიანს, ვინც მხარს მიჭერს. იმედი მაქვს, უკრაინა არ გადასცემს ჩემს თავს ჩვენს საერთო მტერს და მე მექნება საშუალება, ვებრძოლო ჩვენს მტერს“ - წერს გია ცერცვაძე. წერილი "ფეისბუქზე" "ერთიანი ნაციონალური მოძრაობის" ერთერთმა ლიდერმა ნუგზარ წიკლაურმა გამოაქვეყნა.
დღეს გიორგი ცერცვაძის საქმეზე საქართველოს ხელისუფლების მხრიდან არაადეკვატური ქმედებების გამო საპროტესტო აქცია გაიმართა შსს-ს შენობასთან, ორთაჭალაში. აქციის ინიციატორი ენმ იყო. მსგავსი საპროტესტო აქციები 23 იანვარსაც ჩატარდა თბილისში, კანცელარიასთან და უკრაინის საელჩოსთან. აქციები "ფეისბუქზე" სპონტანურად დაიგეგმა.
შეგახსენებთ, უკრაინის ატო-ს ზონაში მებრძოლი ქართველი მოხალისე, შსს-ს სპეცრაზმის ყოფილი წევრი, საქართველოსთვის ერთიანობისთვის წარმოებული ბრძოლების მონაწილე 1992 წლიდან - ვიცე-პოლკოვნიკი გიორგი ცერცვაძე რუსეთის მოთხოვნით, ინტერპოლის ძებნილის სტატუსით, 15 იანვარს, კიევის აეროპორტში დააკავეს.
რუსეთი მის ექსტრადირებას ითხოვს და 2003 წელს სოჭში მომხდარ მკვლელობაში ადანაშაულებს. გიორგი ცერცვაძის ადვოკატი აცხადებს, რომ სინამდვილეში 2003 წლის კრიმინალური საქმე ფაბრიკაციაა, ხოლო რუსეთი გიორგი ცერცვაძეს 2008 წლის რუსეთ-საქართველოს ომში და უკრაინაში, მოხალისის სტატუსით, ატო-ს ბრძოლებში მონაწილეობის გამო სდევნის.
უკრაინამ საქართველოს მოქალაქე, შესაძლოა, რუსეთს არ გადასცეს, თუ ატო-ში მისი მონაწილეობა დადასტურდება. გიორგი ცერცვაძის თემა საქართველოში აქტუალური გახდა მას შემდეგ, რაც ჯერ "ფეისბუქზე", ხოლო კვირას "პოსტსკროპტუმისთვის" ნოდარ მელაძის მიერ მომზადებულ სიუჟეტში დეტალები გახდა ცნობილი.
კერძოდ, მონაცემების მიხედვით, რასაც ცერცვაძის უკრაინელი ადვოკატიც ადასტურებს, ქართულმა მხარემ რუსეთს მიაწოდა ყველა პერსონალური მონაცემი ცერცვაძის შესახებ, რაც მხოლოდ იუსტიციის სამინისტროს სპეციალურ ბაზაშია დაცული.