2017-01-09 00:24

თბილისის საქალაქო სასამართლოში "ქართუ" ბანკის საქმესთან დაკავშირებით პროცესი ჩაინიშნა. სასამართლო პროცესზე პარლამენტში ფრაქცია "ნაციონალური მოძრაობის" თავმჯდომარე ნიკა მელიაა დაბარებული. 

როგორც "აფხაზეთის ხმისთვის" გახდა ცნობილი, სასამართლო პროცესი 10 იანვარს, 14:00 საათზეა ჩანიშნული. პროცესზე გამოცხადების მოთხოვნის შემცველი უწყება ნიკა მელიამ უკვე მიიღო. 

შეგახსენებთ, რომ დღეს გახდა ცნობილი თანაფრაქციელების პრეტენზიის შესახებ ნიკა მელიასადმი. კერძოდ, ერთიანი ნაციონალური მოძრაობის ბოკერია-უგულავას გუნდი ნიკა მელიას ფრაქციის თავმჯდომარეობიდან გადაყენებას უპირებს და ეს საკითხი ასევე, ხვალ უნდა გადაწყდეს.

ფრაქციის წევრებმა ოფიციალური წერილით მიმართეს ნიკა მელიას და ხვალ დილით ყოფილი პარლამენტის შენობაში, თბილისში დაიბარეს, ხოლო სერგო რატიანმა და ირმა ნადირაშვილმა დაადასტურეს, რომ ნიკა მელიასთვის ფრაქციის თავმჯდომარის უფლებამოსილების შეჩერებაა დაგეგმილი. 

შეგახსენებთ, ნიკა მელიას ,,ბანკ ქართუს" გაკოტრების სქემასთან დაკავშირებით ბრალი 2013 წლის იანვარში წაუყენეს:

"მელიას წარედგინა ბრალი, რომელიც გათვალისწინებული სსკ 232­ე მუხლის პირველი ნაწილით, რაც სამსახურეობრივი უფლებამოსილების ბოროტად გამოყენებას გულისხმობს. ასევე წარედგინა ბრალი სსკ 25­ე პრიმა მუხლით, რაც გულისხმობს ქონების დამალვაში დახმარებას და ითვალისწინებს 7­-დან 10 წლამდე თავისუფლების აღკვეთას", - განაცხადა მაშინ ნიკა მელიას ადვოკატმა გოგიტა გაბაიძემ.