ერთიანი ნაციონალური მოძრაობის ყოფილი წევრი, პრეზიდენტის ადმინისტრაციის ყოფილი ხელმძღვანელი ანდრო ბარნოვი ერთიანი ნაციონალური მოძრაობის იმ წევრებს, ვინც "ფართო შემადგენლობის ყრილობის რეალობად ქცევისთვის" მუშაობს, ურჩევს, ჯერ ადგილობრივი ორგანიზაციების შიდაპარტიული არჩევნები ჩაატარონ და შემდეგ - ყრილობა.
ანდრო ბარნოვი წერს:
"ნაც მოძრაობის პოლიტსაბჭოში ვინცაა და ვინც სამარცხვინო გადაწყვეტილებებში მონაწილეობა მიიღო, მათგან სულ 2-3 კაცს ვთხოვთ პასუხს. დანარჩენებს თავი ქუდში აქვთ: მათ პასუხი არც არასოდეს მოკითხვიათ და არც მოეკითხებათ. ვითომ, არც არსებობენ.
აი ესაა საბჭოს ის მოდელი, რომელსაც პარტიის დღევანდელი ხელმძღვანელობა ხვალისთვისაც ამზადებს. ესაა ის მოდელი, რომელსაც ვიღებთ დანიშნული "ლიდერების" შემთხვევაში. არავითარ შემთხვევაში არ შეიძლება იმის დაშვება, რომ მთავარ ოპოზიციურ ძალად წოდებული პარტიის მმართველი ორგანო მკვდარი სულებით იყოს დაკომპლექტებული.
მე, ცხადია, არაფერი ვიცი პარტიაში დღეს მიმდინარე კონკრეტული მუშაობის შესახებ, თუმცა ერთ რამეს ცხადად ვხედავ: ვინც ფართო შემადგენლობის ყრილობის რეალობად ქცევისათვის მუშაობს, ცუდად მუშაობს. თუ ვინმეს იმედი აქვს, რომ პოტენციურ დელეგატებთან კულუარული მუშაობით რამე შედეგი დადგება, ძალიან ცდება.
საჭიროა ფართო კამპანია, ბატონებო და ქალბატონებო. საჭიროა საინიციატივო ჯგუფების მიერ ღია შეხვედრების დაგეგმვა რაიონების მასშტაბით და ძლიერი საინფორმაციო კამპანია, რომელსაც კულუარები ვეღარ დაუპირისპირდება. საჭიროა ტალღის შექმნა ამ გაყიდული ლიდერშიფის წინააღმდეგ. და - დიახ, საჭიროა ყრილობამდე ყველა ადგილობრივი შიდაპარტიული არჩევნების ჩატარება. მითუმეტეს, წესდებაც ამას ითხოვს - ყველა ადგილობრივი ორგანოს ვადა გასულია, ახლებია ასარჩევი...
რა გინდათ, რომ ჯერ ყრილობა ჩატარდეს, ვადაგასულმა დელეგატებმა ჩაატარონ ეს ყრილობა და მერე უკვე ამ ყრილობით არჩეულმა მმართველმა ორგანომ თავის თავზე მოირგოს ადგილობრივი ორგანიზაციები? არ გამოვა ისე არაფერი!
გადაწიეთ ყრილობა, ჩაატარეთ ჯერ არჩევნები. ეს გაყიდული ლიდერშიფი ვერ შეეწინააღმდეგება ამას, ვერც ფორმალურად (წესდებაც ამას ითხოვს) და ვერც მორალურად. გაშალეთ კამპანია და დააკომპლექტეთ პარტია ენერგიული, იდეური ადამიანებით. ადგილობრივ არჩევნებამდე ორი წელია.
რა აუცილებელია ყრილობის დღესვე ჩატარება? გადაწიეთ გაზაფხულისთვის და მიხედეთ მანამდე ადგილობრივ ორგანიზაციებს. ჯანსაღი პროცესისთვის საფუძვლის ჩაყრა მხოლოდ ასე გამოვა".
