2016-11-08 20:51

"ბოლოს და ბოლოს, ყველა უნდა შეეგუოს, რომ მე უკრაინელი პოლიტიკოსი ვარ და გავიმარჯვებ ან დავმარცხდები არა საქართველოში, არამედ - უკრაინაში", - ამის შესახებ მიხეილ სააკაშვილი პეტრო პოროშენკოს კომენტარის საპასუხოდ წერს.

უკრაინის პრეზიდენტმა პეტრო პოროშენკომ ოდესის ოლქის გუბერნატორობიდან სააკაშვილის გადადგომის შემდეგ განაცხადა, რომ მან ქართველები მაღალ თანამდებობაზე სამუშაოდ მოიწვია, მიხეილ სააკაშვილმა კი უკრაინაში აქტიური პოლიტიკური მოღვაწეობის დაწყება მას შემდეგ დააპირა, რაც საქართველოში არჩევნები წააგო. 

„უკრაინის პრეზიდენტმა პოროშენკომ მშვენივრად იცის, რომ მე არ მიმიღია უშუალო მონაწილეობა საქართველოს არჩევნებში და სურვილის შემთხვევაშიც, ამის გაკეთება არც შემეძლო, რადგან უკრაინის მოქალაქე ვარ. მასზე უკეთესად არავინ იცის, რომ ჩემი შედარება დეკანოიძესთან და სხვა „მოწვეულ“ ქართველებთან არაკორექტულია. ჩემს წარმომავლობაზე აპელირება ძალიან ჰგავს ავაკოვისა და მისი მსგავსი მოღვაწეების მეთოდს. მე კი ვისურვებდი, რომ პრეზიდენტი ასეთ რიტორიკაზე მაღლა იდგეს. 

მე უკრაინაში მაშინ ჩამოვედი, როდესაც ჩამოვიდა ჩემი თანაკურსელი პეტრო პოროშენკო. ის მოლდოვიდან, მე კი საქართველოდან. რა თქმა უნდა, უკრაინის მოქალაქეობის მონიჭებისთვის მისი მადლობელი ვარ. ასე რომ, ყველა უნდა შეეგუოს, რომ მე ვარ უკრაინელი პოლიტიკოსი და გავიმარჯვებ ან დავმარცხდები არა საქართველოში, არამედ უკრაინაში.

პრეზიდენტმა ძალიან კარგად იცის, რომ მე ჯერ კიდევ 6 თვის წინ მინდოდა წასვლა, მაგრამ მან რეფორმების გატარების პირობით გადამაფიქრებინა. უბრალოდ ამჯერად მე უკვე აღარ მჯერა დაპირებების და საქართველოს არჩევნები არაფერ შუაშია. 

P.S.

ცოტა სასაცილოა იმის ყურება, თუ როგორ აკისრებენ ერთმანეთს პრეზიდენტის ადმინისტრაცია და მთავრობა გადადგომის შესახებ ჩემი განცხადების დაკმაყოფილებაზე პასუხისმგებლობას. კიდევ ერთი მტკიცებულება იმისა, თუ რა არეულობაა ქვეყანაში“, - წერს სააკაშვილი.