"ქართული ოცნების" გენერალური მდივანი კახა კალაძე და მცხეთის მაჟორიტარი დეპუტატობის კანდიდატი ამავე პარტიიდან დიმიტრი ხუნდაძე, რომლებიც დღეს სოფელ წეროვანის მოსახლეობას შეხვდნენ, უარყოფენ, რომ ოთხი წლის წინ, ამავე სოფელში შეხვედრის დროს ადგილობრივებს კომუნალური გადასახადებისგან გათავისუფლებას ჰპირდებოდნენ.
ამის შესახებ "ტაბულა" წერს, რომელიც დაინტერესდა, რატომ უნდა ენდოს მოსახლეობა "ქართულ ოცნებას" წელს, თუკი 2012 წელს გაცემული წინასაარჩევნო დაპირებები არ შეასრულა.
ტაბულას ადგილობრივმა მიაწოდა მაშინდელი წინასაარჩევნო დანაპირების ჩამონათვალი, რომელიც, მისი თქმით, დიმიტრი ხუნდაძემ დაარიგა და რომელსაც ხუნდაძის ხელმოწერა აქვს.
"ეს სიცრუეა, არასწორი ინფორმაციაა და გთხოვთ, დემაგოგიაზე დაფუძნებული ინფორმაციის გავრცელებისგან თავი შეიკავოთ. დიმიტრი ხუნდაძეს რაც ჰქონდა წარმოდგენილი საარჩევნო კამპანიის დროს, გაასაჯაროვა და A4 ფურცელზე დაბეჭდილი აბსურდული განცხადებები ვფიქრობ, არაა სერიოზული. ანალოგიურად, ნებისმიერ ადამიანს შეუძლია, თავისი მოსაზრება დაწეროს A4 ფურცელზე, ხელი მოაწეროს და თქვას, რომ ქართული ოცნების მიერაა წარმოდგენილი", - თქვა კალაძემ.
დიმიტრი ხუნდაძის თქმით, ეს ყალბი დოკუმენტია. "არ არის ეს ჩემი ხელმოწერა, უფასო გაზს არ დავპირებივარ. ექსპერტიზა ჩაატარეთ. ყალბი დოკუმენტია", - თქვა მან.
