2016-08-23 13:41

მცხეთაში "ქართული ოცნების" მიერ წარდგენილი მაჟორიტარი დეპუტატობის კანდიდატის დიმიტრი ხუნდაძის წინასაარჩევნო შეხვედრები მოსაზხლეობასთან ამომრჩეველთა განხილვის საგანი გახდა. ისინი, ვინც შეხვედრებზე მისვლა ვერ მოახერხეს, დიმიტრი ხუნდაძის ცნობილ გზავნილს: "800-დე სამუშაო ადგილი მცხეთაში უკვე შექმნილია" და სხვა ფაქტებს მისი ანგარიშიდან სიცრუეს უწოდებენ და დიმიტრი ხუნდაძეს ალტერნატიული სტატისტიკითა და ფაქტებით უპირისპირდებიან. 

"...ყველაზე მთავარი არის ის, რომ მცხეთას არ ჰქონდა კულტურის სახლი და დღეს უკვე დასრულებულია 4,5 მლნ. პროექტი; ყველა ხელისუფლება პირდებოდა მცხეთელებს მათი ოცნების ასრულებას – საცურაო აუზს და არავინ აკეთებდა. ეს პროექტიც თითქმის დასრულებულია და მცხეთელებს მალე ექნებათ 6 მლნ. ღირებულების საცურაო აუზი და სპორტული კომპლექსი. 

ნოემბერში დაიწყება მუზეუმის 5 მლნ. პროექტის განხორციელება, რომელიც აქამდე უკვე დასრულებული უნდა ყოფილიყო, მაგრამ ალბათ ახსოვს მოსახლეობას ჩემი ბრძოლა ამ საკითხთან დაკავშირებით. დასრულდა 10 მლნ. პროექტი – თანამედროვე, ახალი აპარატურით აღჭურვილი საავადმყოფო, სადაც მოწვეულნი იქნებიან ექიმები უცხოეთიდან, ამაზე უკვე შედგა მოლაპარაკება. საავადმყოფო ოქტომბერში გაიხსნება. მხოლოდ აქ 250 კაცი უნდა დასაქმდეს; 

აშენდა ახალი ხიდი მცხეთაში; დაიწყო რამდენიმე კერძო საწარმოს მშენებლობა და ა.შ. ამ მოკლე პერიოდში მცხეთაში 800-მდე სამუშაო ადგილი შეიქმნა, სადაც დასაქმება ეტაპობრივად, სექტემბრის ბოლოდან დაიწყება.

სკოლების და ბაღების მშენებლობა მომავალშიც გაგრძელდება. ეს არის ის პროექტები, რომელსაც მე დავპირდი მოსახლეობას და მათ განსახორციელებლად ძალიან დიდი ძალისხმევა, შრომა და არ დაგიმალავთ, ბრძოლაც კი დამჭირდა", - აღნიშნა დიმიტრი ხუნდაძემ ერთერთ წინასაარჩევნო შეხვედრაზე.

ამ შეხვედრასთან დაკავშირებით "აფხაზეთის ხმას" მცხეთაში მცხოვრები მოქალაქე დაუკავშირდა, რომელმაც გვთხოვა, მისი პუნქტობრივი პასუხები გამოგვექვეყნებინა, სადაც ალტერნატიული და, მოქალაქის მტკიცებით, ობიექტური რეალობაა ასახული. მცხეთაში მცხოვრების თქმით, ის პირადად გეგმავდა ამ შეხვედრაზე მისვლას, თუმცა, ჯანმრთელობის მდგომარეობამ ხელი შეუშალა, რის შემდეგაც პასუხები სახელდახელოდ ჩამოწერა და რამდენიმე მედიასაშუალებას გაუგზავნა:

"კულტურის სახლი დღეს უკვე დასრულებულია 4,5 მლნ." – გვატყუებს: არ დასრულებულა, 2017–ში უნდა დასრულდეს;

,,ყველა ხელისუფლება პირდებოდა მცხეთელებს მათი ოცნების ასრულებას - საცურაო აუზს და არავინ აკეთებდა - ეს პროექტიც თითქმის დასრულებულია და მცხეთელებს მალე ექნებათ 6 მლნ. ღირებულების საცურაო აუზი და სპორტული კომპლექსი.'' - გვატყუებს, არ დასრულებულა, 2017 წელია დასრულების ვადა.

,,ნოემბერში დაიწყება მუზეუმის 5 მლნ. პროექტის განხორციელება, რომელიც აქამდე უკვე დასრულებული უნდა ყოფილიყო, მაგრამ ალბათ ახსოვს მოსახლეობას ჩემი ბრძოლა ამ საკითხთან დაკავშირებით..'' არც დაწყებულა და არც დაიწყება, იუნესკოსთან ვერ ხდება შეთანხმება.

"დასრულდა 10 მლნ. პროექტი - თანამედროვე, ახალი აპარატურით არჭურვილი საავადმყოფო ''–გვატყუებს: არ დასრულებულა და წელს ვერც გაიხსნება.

"აშენდა ახალი ხიდი მცხეთაში'' - არ დასრულებულა.

"ამ მოკლე პერიოდში მცხეთაში 800-მდე სამუშაო ადგილი შეიქმნა, სადაც დასაქმება ეტპობრივად, სექტემბრის ბოლოდან დაიწყება" - ტყუილია. თუ მართალია და თუ შეიქმნა 800 ადგილი, დასაქმებას სექტემბრის ბოლოდან რატომ იწყებენ?", - გვწერს მცხეთაში რეგისტრირებული ამომრჩეველი.