2016-01-15 15:16

გაზეთ ქრონიკა პლუსის რედაქტორის ელისო კილაძის ინფორმაციით, პირადი ცხოვრების ამსახველი კადრებით შანტაჟზე აღმასრულებელ ხელისუფლებაში სპეციალური ჯგუფი მუშაობს.

ელისო კილაძის მიერ დღევანდელ პრესკონფერენციაზე გაჟღერებული სკანდალური ინფორმაციის მიხედვით, იგეგმება შეწყალების კომისიის ყოფილი და მოქმედი თავმჯდომარეების ზვიად ქორიძისა და ალეკო ელისაშვილის დაშანტაჟება პირადი ცხოვრების ამსახველი კადრების მეშვეობით. 

მისი თქმით, ამ მიზნით, ასევე, სამეგრელოში "ზვიადისტების" ნაწილის მხარდაჭერაზე გათვლილი არეულობის მოწყობისთვის, დიასპორის მინისტრის მოადგილეს სანდრო ბრეგაძეს სპეცსახსრებიდან მოთხოვნილი აქვს 30 ათასი აშშ დოლარი, მას გეგმის განხორციელებაში "ასავალ-დასავალის" ჟურნალისტი ზაზა დავითაია, ლადო სადღობელაშვილი და სააგენტო "მარშალპრესი" ეხმარებიან, რომელსაც უსაფრთხოების სააგენტოს დირექტორის მოადგილე სოსო გოგაშვილი აფინასებს. 

ელისო კილაძემ დღევანდელ პრესკონფერენციაზე განაცხადა, რომ ეს პირები ვაშლიჯვრის რესტორანში იკრიბებიან და არეულობის გეგმებს აწყობენ. ელისო კილაძე მოქმედ პრემიერმინისტრს მოუწოდებს, გაემიჯნოს ამ მარგინალურ ჯგუფს.