2015-11-10 17:00

ერთიანი ნაციონალური მოძრაობის საგარეო ურთიერთობათა მდივანი გიგა ბოკერია და საპარლამენტო უმცირესობის წევრი ამავე პარტიიდან ნუგზარ წიკლაური სუს-ში ხელმეორე დაკითხვაზე და ე.წ. ხმის ტესტირებაზე გამოცხადებას არ აპირებენ.

"ზედაცინვა მოიგონეს - რაღაც ხმის ტესტირება უნდა ჩაგიტაროთო. კიდევ ერთხელ ხაზს ვუსვამ, მაშინ, როცა ქვეყნის წინაშე უმძიმესი გამოწვევები დგას; მაშინ, როცა ჩვენ უნდა გვქონდეს დისკუსია, როგორ უნდა გამოვიყვანოთ ქვეყანა იმ კრიზისიდან, რომელშიც ივანიშვილმა შეიყვანა და გვაქვს კონკრეტული ინიციატივები; დგას ფუნდამენტური საკითხი რუსთავი 2-ის და კონსტიტუციის ფარგლებიდან გასვლის, ივანიშვილის დაქირავებული სტრუქტურები გვთავაზობს ამ დამცინავ მასკარადს და, რა თქმა უნდა, ჩვენ ამაში ნებაყოფლობით არანაირ მონაწილეობას არ მივიღებთ", - აცხადებს გიგა ბოკერია.

„გუშინ ჩემს ტელეფონზე ზარი შემოვიდა. მითხრეს, რომ გუშინ საღამოსვე, 9 სათზე, გამომძიებელი მომაკითხავდა და უწყებას მოიტანდა. თუმცა მან, ჟარგონულად რომ ვთქვა, „გადამაგდო“. დღეს დილით სახლში სხვა გამომძიებელი მოვიდა და უწყება გადმომცა. მან მითხრა, რომ სახელმწიფო უსაფრთხოების სამსახურში ხმის სინჯების ასაღებად უნდა მივიდე.

იქ მისვლას არ ვაპირებ, რადგან პირველი დაკითხვისას ყველა კითხვას ამომწურავი პასუხი გავეცი. ეს გამოძიება არ ემსახურება არც სახელმწიფო გადატრიალების მცდელობას, რომელიც ბუნებაში არ არსებობს, არც მოქალაქის უსაფრთხოებას, არც საქართველოს ინტერესებს. ესაა პრიმიტივი ბიძინა ივანიშვილის სურვილი, რომ ნაციონალური მოძრაობის წევრები მუდმივად დადიოდნენ დაკითხვებზე. ესაა პოლიტიკური შოუს მოწყობის მცდელობა და ამიტომ ამ პოლიტიკურ მასკარადში მონაწილეობის მიღებას არ ვაპირებ. სუს-ში მხოლოდ იმ შემთხვევაში მივალ, თუ ამას სასამართლო გადაწყვეტს და ისე მოვიქცევი, როგორც კანონმროჩილი მოქალაქე“, - აცხადებს ნუგზარ წიკლაური.