2015-10-02 00:25

"რუსთავი 2"-ის ირგვლივ მიმდინარე პროცესებთან დაკავშირებით ვრცლად ისაუბრა ევროსაბჭოში ერთიანი ნაციონალური მოძრაობის წევრმა ჩიორა თაქთაქიშვილმა. დეპუტატმა ევროპელ დიპლომატებს რუსთავი 2-ის დამფუძნებლის, ეროსი კიწმარიშვილის გარდაცვალების ფაქტიც შეახსენა.

"სამწუხაროდ, უნდა მოგაწოდოთ ინფორმაცია, რომელიც ეხება ბოლო ორ დღეში გაუარესებულ მდგომარეობას მედიის თავისუფლების კუთხით. განსაკუთრებით ყურადღება უნდა მივაქციოთ მთავარ სამაუწყებლო კომპანიას, რომელიც თავისუფალია ხელისუფლების გავლენისგან და არ კონტროლდება მილიარდელი ივანიშვილის მიერ, რომელიც პერსონალურად აკონტროლებს საქართველოს დღევანდელ პოლიტიკურ სპექტრს.

დღეს "რუსთავი 2"-ის მფლობელი კომპანიის საბანკო ანგარიშები და აქციები გაიყინა. ამაზე დაყდრონობით არხის გენერალურმა დირექტორმა განაცხადა, რომ თავისუფალი და დამოუკიდებელი მედიის არსებობა საფრთხის ქვეშაა. ჟურნალისტებმა, შესაძლოა, სამუშაო დაკარგონ.

"რუსთავი 2"-ის დამაარსებელი, რომელსაც მფლობელთან დაკავშირებით სრული იფნორმაცია ჰქონდა, გარდაცვლილი იპოვეს. მომხდარიდან 5 წუთის შემდეგ ხელისუფლება ირწმუნებოდა, რომ ეს თვითმკვლელობა იყო. მოგიწოდებთ მივიღოთ სათანადო ზომები, სანამ ძალიან გვიან არ არის,"- განაცხადა ჩიორა თაქთაქიშვილმა.

"რუსთავი-2"