"სამწუხაროდ, ეს იყო მიზანმიმართული პროპაგანდა სამართალდამცავი ორგანოების წინააღმდეგ“, - აცხადებს ტყიბულის მაჟორიტარი დეპუტატი "ქართული ოცნებიდან", ყოფილი ჟურნალისტი და 90-იანი წლების პოლიციის მამხილებელი არაერთი ჟურნალისტური გამოძიების ავტორი ელისო ჩაფიძე, რომელიც საპატრულო პოლიციის კამერებით გადაღებულ მასალებს "ფარულ ჩანაწერებად" მოიხსენიებს.
როგორც ცნობილია, საპატრულო პოლიციის ნებისმიერ თანამშრომელს, რომელიც აღჭურვილია სამკერდე ვიდეოკამერით, კანონით ევალება ჩაიწეროს ყველა ის საუბარი, რომელსაც დარღვევისთვის ან სხვა მიზნით გაჩერებულ მოქალაქესთან გამართავს, შესაბამისად, ჩანაწერი არ არის არც ფარული და არც უკანონო.
“უნდა დადასტურდეს აღნიშნული მასალის ავთენტურობა და გამოძიებული უნდა იქნას, რამდენად შეესაბამება ის ფაქტები რეალობას, რომელიც ფირში იყო წარმოდგენილი და, ასევე, უნდა დადგინდეს, კონკრეტულ პიროვნებას რა მიზნები ამოძრავებს. არც ერთ პოლიტიკურ ძალას თუ ორგანიზაციას სამართალდამცავი ორგანოების დისკრედიტაცია კარგს არაფერს მოუტანს.
სამწუხაროდ, მეჩვენება, რომ გარკვეული ფარული ჩანაწერების განზოგადება და გადატანა ხდება იმ მრავალათასიან კოლექტივზე, რომელიც დღეს საქართველოში წესრიგის დაცვას ემსახურება", - დაამატა ელისო ჩაფიძემ.
