2015-09-14 07:11

ერეკლე მეორის საზოგადოება პრეზიდენტის სასახლესთან საპროტესტო აქციის ჩატარებას აანონსებს, ოღონდ, რამდენიმე დღის წინ რუსულ "სპუტნიკზე" გავრცელებული მათივე განცხადების საპირისპიროდ, ამჯერად არ მიუთითებს, რომ აქცია ნატოს წინააღმდეგაა დაგეგმილი.

ამჯერად ერეკლე მეორის საზოგადოება წერს:

„საქართველოს პრეზიდენტი ბატონი გიორგი მარგველაშვილი, რომელსაც თავისი ოჯახის წევრებიც კი არ მისცემდნენ ხმას, რომ არა ბიძინა ივანიშვილი, აღმოჩნდა, რომ ის იქცა მხოლოდ ლომჯარია, კოჟორიძეების და ნაციონალური მოძრაობის მხარდამჭერთა პრეზიდენტად და აბსოლუტურად უგულებელყოფს საქართველოს მოსახლეობის უმრავლესობის ნებას".

აღსანიშნავია, რომ ზუსტად ამ განცხადებაში მითითებულ დღესა და საათს ემთხვევა აქცია, რომელიც ამავე საზოგადოებამ და "ევრაზიული არჩევანი - საქართველომ" რუსულ მედიაში დაანონსეს. განცხადებაში მითითებული იყო, რომ მთავარი მოთხოვნა საქართველოში ნატოს საწვრთნელი ცენტრების გაუქმება და რუსეთთან დიპლომატიური ურთიერთობების აღდგენა იქნებოდა.

მოთხოვნებში ასევე შედიოდა პრეზიდენტის მიერ სამხედრო ნეიტრალიტეტის გამოცხადება. აქციის მონაწილეთა შეკრება მეტროსადგურ „ავლაბართან“ 12 საათიდაანაა დაგეგმილი, სადაც თავს მოიყრიან რეგიონებიდან ჩამოსული მოქალაქეებიც, ხოლო შემდეგ პრეზიდენტის სასახლისკენ მსვლელობაა დაგეგმილი.

აქცია პრეზიდენტის სასახლესთან 13:00 საათზე დაიწყება, მას ანსამბლი „ივერია“ გახსნის. განცხადებაში აღნიშნულია, რომ აქციის მონაწილეთა სიმრავლის გამო 13-დან 15 საათამდე გადაიკეტება პრეზიდენტის სასახლის მიმდებარე ქუჩები.