2015-09-09 16:53

„ევრაზიული არჩევანი“ და „ერეკლე მეორის საზოგადოება“ თბილისში, 24 სექტემბერს, პრეზიდენტის სასახლესთან აქციის გამართვას გეგმავს. აქციის მთავარი მოთხოვნა საქართველოში ნატოს საწვრთნელი ცენტრების გაუქმება და რუსეთთან დიპლომატიური ურთიერთობების აღდგენა იქნება.

მოთხოვნებში ასევე შედის პრეზიდენტის მიერ სამხედრო ნეიტრალიტეტის გამოცხადება. აქციის მონაწილეთა შეკრება მეტროსადგურ „ავლაბართან“ 12 საათიდაანაა დაგეგმილი, სადაც თავს მოიყრიან რეგიონებიდან ჩამოსული მოქალაქეებიც, ხოლო შემდეგ პრეზიდენტის სასახლისკენ მსვლელობაა დაგეგმილი.

აქცია პრეზიდენტის სასახლესთან 13:00 საათზე დაიწყება, მას ანსამბლი „ივერია“ გახსნის. განცხადებაში აღნიშნულია, რომ აქციის მონაწილეთა სიმრავლის გამო 13-დან 15 საათამდე გადაიკეტება პრეზიდენტის სასახლის მიმდებარე ქუჩები.