2014-05-01 07:46

ბაქოში ვიზიტად მყოფმა საქართველოს მესამე პრეზიდენტმა მიხეილ სააკაშვილმა ბაქოს უნივერსიტეტის სტუდენტებთან შეხვედრისას განაცხადა, რომ მას დეჟავუს განცდა აქვს იმ მოვლენების გამო, რომლებიც საქართველოსა და აზერბაიჯანის ირგვლივ მიმდინარეობს.

„ახლა ბრძოლა პოლიტიკურ ნებათა შორის მიმდინარეობს. პუტინს აქვს შემტევობის ნება, ხოლო დასავლეთს არა ქვს წინააღმდეგობის გაწევის ნება. ჩემთვის ეს ცალსახა განცდაა: დეჟავუს განცდა მაქვს, თითქოს უკან, „ალი და ნინოს“ ეპოქაში დავბრუნდით. მრჩება იმედი, რომ ახალი ისტორია არ დასრულდება ისე ტრაგიკულად, როგორც დასრულდა მეოცე საუკუნის ის ტრაგიკული სიყვარული“,

- ასე გაიხსენა სტუდენტებთან შეხვედრა მიხეილ სააკაშვილმა აზერბაიჯანულ გამოცემა haqqin.az-სთან საუბრისას, ხოლო ჟურნალისტის კითხვაზე, ხედავს თუ არა საფრთხეს, რომ საქართველომ და აზერბაიჯანმა, შესაძლოა, ისევე დაასრულონ თავიანთი დამოუკიდებლობა, როგორც გასული საუკუნის დასაწყისში დაასრულეს, პასუხობს:

„ყოველ შემთხვევაში, იმ ძალებს, რომლებმაც ეს პროცესი წამოიწყეს, სწორედ ეს უნდათ. მაგრამ ყველაზე დიდი ბარიერი ამ ძალებისთვის, ჩვენი თანამედროვეობის განმასხვავებელი ფაქტორი წარსულისგან - ახალი თაობაა. მე მქონდა შეხვედრა აზერბაიჯანელ სტუდენტებთან, რომელთა უმრავლესობა სსრ კავშირის დაშლის შემდეგ დაიბადა.

მთელი თაობა გაიზარდა, რომელსაც ვერ წარმოუდგენია, როგორ შეიძლება იცხოვრო ისეთ ქვეყანაში, რომელიც არაა დამოუკიდებელი. სწორედ ესაა იმ ძალებისთვის მთავარი შემაფარხებელი ფაქტორი“.