ანტიდისკრიმინაციული კანონის განხილვასთან დაკავშირებით საპატრიარქოს პოზიციის გამოხატვის შემდეგ განცხადებას ავრცელებს დემოკრატიული განვითარების ეროვნული ცენტრი და აღნიშნავს, რომ საპატრიარქოს პოზიცია შემაშფოთებელია.
განცხადებაში, კერძოდ, ნათქვამია:
„შემაშფოთებელია საქართველოს საპატრიარქოს პოზიცია, რადგან მისი ბოლოდროინდელი განცხადებები ანტიქართული პროპაგანდითაა გაჯერებული. ქართველი ხალხი აცნობიერებს, რომ მისი ევროპული მომავალი დემოკრატიული ინსტიტუტების განვითარებაზეა დამოკიდებული. უნდა ვაღიაროთ, რომ ადამიანის უფლებების დაცვის ხარისხის ამაღლება ქვეყნის დემოკრატიზაციის წინაპირობაა და ამ პროცესის შეფერხება სახელმწიფოს წინააღმდეგ გალაშქრებაა.
ეჭვგარეშეა, რომ საქართველოს საპატრიარქომ არჩევანი გააკეთა და ეს არაა ევროპა. ჩვენი საზოგადოებისთვის ყოვლად მიუღებელია, როდესაც რელიგიური ინსტიტუტი ესოდენ პოლიტიზებულია. მიუღებელია, როდესაც საპატრიარქოს წარმომადგენლები არჩევნებზე გავლენით იმუქრებიან.
ჩვენ ვერ მივესალმებით იმ ფაქტს, როდესაც ეკლესია საკანონმდებლო ორგანოზე მსგავს ზეწოლას ახორციელებს და ამისათვის შანტაჟის სხვა და სხვა ფორმას მიმართავს. რჩება შთაბეჭდილება რომ საპატრიარქო ცდილობს ხალხს ევროპაზე მცდარი წარმოდგენა შეუქმნას და მიგვაჩნია, რომ ეს შემთხვევითობა არაა. ვეჭვობთ, რომ მსგავსი ფსევდოეროვნული განცხადებების უკან სხვა ძალები დგანან, რომელთა მიზანიც სახელმწიფოს ევროპული მომავლის ხელყოფაა.
მოვუწოდებთ ხელისუფლებას გამოიჩინოს მეტი პრინციპულობა, როდესაც ქვეყნის ბედი წყდება, სხვა შემთხვევაში მისი გადაწყვეტილება არალეგიტიმური იქნება. საკანონმდებლო ორგანო უდიდესი მხარდაჭერით სარგებლობს და მისი სისუსტე დაუშვებელია რადგან საკითხი ადამიანის უფლებებს ეხება.“