2014-05-01 06:11

საქართველოს პრეზიდენტმა გიორგი მარგველაშვილმა უკრაინასთან მიმართებაში რუსეთის მხრიდან გადადგმული ნაბიჯების განხილვისა და მათზე მსოფლიოს ცივილიზებული ნაწილის რეაქციაზე საუბრისას აღნიშნა, რომ რუსეთის მიმართ სანქციების გატარება აუცილებელია.

გიორგი მარგველაშვილის თქმით, 2008 წელს საერთაშორისო რეაქცია იყო, მაგრამ მან დაიგვიანა და თუ საუბარია რუსეთის მიმართ სანქციებზე, ეს უნდა განვიხილოთ უკრაინასა და საქართველოსთან მიმართებაში ერთ ჭრილში, რადგან ერთ ხელწერასთან გვაქვს საქმე:

„აუცილებელია საუბარი ეტაპობრივ და კონსოლიდირებულ სანქციებზე რუსეთის მიმართ. ამ სანქციებზე საუბარი საჭიროა არა უბრალოდ პიარულად და ერთჯერადად, არამედ სანქციები აუცილებლად დროში გაწერილი უნდა იყოს, არ უნდა მოხდეს ისე, როგორც 2008 წელს მოხდა, მართალია პირველი რეაქცია იყო, მაგრამ შემდგომმა პერიოდმა აჩვენა, რომ ძალიან ბევრი მექანიზმი არ იქნა ამუშავებული.

2008 წლის საქართველოს ომის მიმართ არ იყო დროში გაწერილი ეს რეაქცია, სავარაუდოდ ამის გამო სადღაც გადაწყვიტეს, რომ 2014 წელს შესაძლებელი იყო ყირიმში იგივეს გამეორება.

როდესაც ვსაუბრობთ მომავალზე და სანქციებზე საუბარი უნდა იყოს საქართველოზეც და უკრაინაზეც იმიტომ, რომ ეს არის ერთი ხელწერა”,- განაცხადა გიორგი მარგველაშვილმა “პირველ სტუდიაში”.