2014-04-30 14:42

ქუთაისში, პარლამენტის შენობასთან შეკრებილი სასულიერო პირები თბილისში, პარლამენტის ყოფილ შენობასთან შეკრებილებს მობილურით უკავშირდებიან და ქუთაისში არყოფნის გამო პრეტენზიას უცხადებენ.

როგორც „აფხაზეთის ხმის“ კორესპონდენტი შემთხვევის ადგილიდან იტყობინება, ის თავად გახდა მომსწრე, როგორ დაუკავშირდა ქუთაისში მყოფი რუის-ურბნისელი არქიმანდრიტი ნიკოლოზ პიტნავა თბილისში, აქცია-პარაკლისზე მყოფ ერთერთ სასულიერო პირს (ეს დასკვნა კორესპონდენტმა მოსაუბრისადმი არქიმანდრიტის მიმართვის ფორმიდან გამომდინარე გამოიტანა, - რედ.) და პრეტენზია განუცხადა, რომ ის ქუთაისში არ იყო.

პიტნავას თქმით, ქუთაისში არყოფნით ნებისმიერი სასულიერო პირი კანონის მხარდამჭერი გამოდის.

მოგვიანებით, მან მრევლთან საუბრისას გაიმეორა, რომ ის მღვდელმთავარი, რომელსაც მრევლისთვის ქუთაისში, აქციაზე მისვლის კურთხევა არა აქვს მიცემული, მღვდელმთავარი აღარ არის და უნდა განიკვეთოს.

შეგახსენებთ, რომ დღეს ანტიდისკრიმინაციული კანონის საწინააღმდეგო აქცია-პარაკლისი თბილისსა და ქუთაისში ერთობლივად დაიგეგმა.