2014-04-06 16:27

თბილისის იუსტიციის სახლი ხვალიდან მუშაობას განაახლებს და მომხმარებელს მომსახურებას კვლავ ერთ სივრცეში შესთავაზებს.

იუსტიციის სახლი ტრადიციულად ყოველდღე, 09:00-დან 18:00 საათამდე იმუშავებს. პარალელურ რეჟიმში მუშობას შეწყვეტს სამივე დროებითი ფილიალი, რომლებიც საგანგებოდ იუსტიციის სახლში მიმდინარე სარემონტო სამუშაოების მიმდინარეობისას იყო გახსნილი. შესაბამისად, 7 აპრილიდან ყველა მომხმარებელმა, იუსტიციის სახლის 300-ზე მეტი სერვისის მისაღებად, მხოლოდ თბილისის იუსტიციის სახლში უნდა მიმართოს.

იუსტიციის სახლში სარემონტო სამუშაოების განხორციელება ძლიერი ქარის გამო სახურავის მე-7 პეტალის დაზიანების შემდეგ გახდა საჭირო. შეკეთდა და გამაგრდა სახურავის კონსტრუქციის როგორც გარე, ისე შიდა მონაკვეთი. განხორციელდა სახურავის სარეაბილიტაციო სამუშაოები, დადუღდა ასეულობით გაუმაგრებელი წერტილი. ექსპერტების შეფასებით, იუსტიციის სახლის სახურავი სარემონტო სამუშაოების შემდეგ სრულებით უსაფრთხოა, როგორც იუსტიციის სახლის მომსახურე პერსონალისთვის, ისე მომხმარებლისთვის.