თბილისის უფლებამოსილებაშეჩერებული მერი გიგი უგულავა შალვა თათუხაშვილის საქმესთან დაკავშირებით პროკურატურის მიერ გავრცელებულ განცხადებას ეხმაურება და საგამოძიებო ორგანოს „ყაჩაღთა ბანდას“ უწოდებს:
"პროკურატურა უსირცხვილოდ ტყუის და ძალიან ვწუხვარ, რომ მათ არ აქვთ თუნდაც წარსულ შეცდომებზე სწორი დასკვნის უნარი. რაც არ უნდა ალკოჰოლიკად, ფსიქიკურად აშლილად გამოაცხადონ ადამიანი, კითხვები არის, კითხვები არის ლეგიტიმური და არ ჩაცხრება. რაც უფრო ჯიუტად შემოგვთავაზებენ ახალ-ახალ, რაღაც ერთმანეთთან დაუკავშირებელ ვერსიებს, მით უფრო მეტი პრობლემა შეიქმნება. მათთვის შეიქმნება ეს პრობლემა, იმიტომ, რომ როცა გარდაცვლილია ადამიანი, ამ ოჯახს უკან დასახევი გზა არ აქვს. ეს ხომ კარგად უნდა იცოდნენ. გუშინ საუბრობდა პროკურორი, რომ სანდო არ არის ალტერნატიული ექსპერტიზა, იმიტომ, რომ ფოტომასალაზეა დაყრდნობილი. კი მაგრამ, ფოტომასალებზე დაყრდნობილიც კი არ გაუკეთებიათ ჟვანიას საქმეზე, ჩიჩუა ისეა დაჭერილი. ეს ორმაგი სტანდარტი ანგრევს პროკურატურას, მის სანდოობას ნულის ქვევით აგდებს. ეს არ არის ერთადერთი კითხვა, რომელიც ამ უწყების მიმართ არსებობს. მისი ქმედებები მთლიანად გაცდა საკანონმდებლო სივრცეს. ეს არის ჩვეულებრივ ყაჩაღთა ბანდა, რომელსაც ყაჩაღი ფარცხალაძე ხელმძღვანელობს", - განაცხადა უგულავამ.
