2014-04-06 09:41

„რუსეთს არ აშინებს, რომ ამ გზით - პასპორტების გაცემის გამარტივებით, შესაძლოა, საქართველოსთან ურთიერთობა გაუარესდეს, რადგან ჩვენ, პირველ რიგში, ჩვენი ინტერესები უნდა დავიცვათ“, -

ამის შესახებ პოლიტოლოგმა,რუსეთის ფედერაციის საზოგადოებრივი პალატის წევრმა სერგეი მარკოვმა აზერბაიჯანულ გამოცემა 1news.az-თან საუბრისას განაცხადა.

მისი თქმით, რუსეთს არა აქვს მოლოდინი, რომ საქართველოში, ეთნიკური სომხებით დასახლებულ სამცხე-ჯავახეთში რუსეთის პასპორტების მასობრივი გაცემა რუსეთისა და საქართველოს ურთიერთობებს გააუარესებს, ან ორ ქვეყანას შორის კონფლიქტის მაპროვოცირებელი ფაქტორი გახდება.

მარკოვი აცხადებს, რუსეთი მოხარული იქნება საქართველოსთან ურთიერთობის გაუმჯობესების გამო, მაგრამ ეს საქართველოს ხელისუფლების ნებაზეა დამოკიდებული. მარკოვს ასევე ნაკლებად სარწმუნოდ მიაჩნია სომხეთთან კონფლიქტის სცენარი: „მე ვფიქრობ, სომხეთის ხელისუფლება ამით არ იქნება დაინტერესებული, რადგან სომხეთი საქართველოს აღიქვამს, როგორც ტრანზიტულ ტერიტორიას“, - თქვა მან.

ამასთან, მარკოვი აცხადებს, რომ რუსეთის პასპორტების მიღების შესაძლებლობა უნდა ჰქონდეს ყველას, ვინც ამას მოისურვებს. მისივე თქმით, ცალკეულ ქვეყნებსა და რეგიონებში რუსეთის პასპორტებზე განსაკუთრებული მოთხოვნა არ შეინიშნება - მაგალითად, აზერბაიჯანში. მარკოვი ამას იმით ხსნის, რომ აზერბაიჯანში სტაბილური სიტუაციაა, ცხოვრების დონე კი დღითიდღე უმჯობესდება.

მარკოვს მიაჩნია, რომ იმ რეგიონებში, სადაც ნაციონალისტური ჯგუფების მხრიდან ადამიანის უფლებები ირღვევა, რუსეთის მოქალაქეობის მიღების სურვილი მატულობს. რუსმა პოლიტოლოგმა არ გამორიცხა, რომ შესაძლოა, სამცხე-ჯავახეთი სწორედ ასეთი რეგიონების რიცხვში შედიოდეს: „ქართული ელიტა, ტრადიციულად, ნაციონალისტურადაა განწყობილი, ამიტომაც, საქართველოში ეთნიკური უმცირესობა ხშირად დგას სიძნელეების წინაშე. შესაძლოა, სამცხე-ჯავახეთში მართლაც არის რაღაც პრობლემები“, - ამბობს მარკოვი.