2014-04-05 00:59

საქართველოს მთავარი პროკურორის მოადგილემ ირაკლი შოთაძემ „რეაქციაში“ გამოსვლის დროს, იმის დასამტკიცებლად, რომ გარდაცვალებამდე შალვა თათუხაშვილი სახლში იმყოფებოდა, მისი მობილურიდან დეტალურ ამონაწერთან ერთად, მისი პრივატული საუბრების შინაარსიც გაამჟღავნა.

შესაბამისად, მთავარი პროკურორის მოადგილის გამოსვლიდან ირკვევა, რომ შალვა თათუხაშვილის მობილური ტელეფონი ისმინებოდა მაშინაც კი, როცა ის შინ იმყოფებოდა, ვინაიდან ცნობილია, რომ ფიჭური კავშირგაბმულობის კომპანიის მიერ გაცემული დეტალური ამონაწერიდან ჩანს არა საუბრის შინაარსი, არამედ ზარის დრო და ის, თუ რომელი ტერიტორიაზე მდებარე ანძაზე ფიქსირდება მობილური ტელეფონის სიგნალი. ამასთან, გადაცემის მსვლელობის დროს მთავარი პროკურორის მოადგილეს არ განუცხადებია, რომ სასამართლოსგან მიღებული ჰქონდათ ნებართვა შალვა თათუხაშვილის სატელეფონო საუბრების მოსმენაზე.

„ექსპერტის დასკვნაში არის ერთი დეტალი, რომელზეც ყურადღებას გავამახვილებ: ეს არის დაზიანებების ხანდაზმულობა. მოგეხსენებათ, შესაძლებელია, ექსპერტმა დაადგინოს ის, თუ როდინდელია დაზიანება.

დადგინდა, რომ დაზიანებები მიღებულია მაშინ, როცა თათუხაშვილი სახლში იმყოფებოდა, რაც დასტურდება მისი მობილური ტელეფონის ნომრის დეტალური ამონაწერით, როცა მან ერთ შემთხვევაში დაურეკა გამომძიებელს და უთხრა, რომ სახლში იმყოფებოდა, მეორეჯერ კი ასევე დაურეკა და შეხვედრა სთხოვა, მაგრამ ეს შეხვედრა ვერ შედგა, რადგან თათუხაშვილს ინტოქსიკაცია ჰქონდა მიღებული. ეს ზარები თელეთის ანძაზე დაფიქსირდა“, - განაცხადა ირაკლი შოთაძემ.