-
2014-03-23 15:37
ნიკა ობოლაძე წერს, რომ გადამწყვეტი კვირები დადგა და ამ კვირებში საქართველოს ბედი გადაწყდება, ხოლო საქართველოში არსებული პოლიტიკური სიტუაციის ანალიზის დროს ასკვნის, რომ „ქართული ოცნება“ ურეიტინგოა.
„გადამწყვეტი კვირებიც მოვიდა.
მიშას პოზიციები მყარდება, მხოლოდ მარტში 50- მდე ინტერვიუ მისცა საერთაშორისო ბეჭდური თუ სატელევიზიო მედიის წარმომადგენლებს, შეხვედრებს მართავს ევროპის მოქმედ ლიდერებთა, ამერიკის სენატორებთან და კონგრესმენებთან, უკრაინის დღევანდელი ხელისუფლება, ფაქტობრივად, მისი შვილობილია, 46 მილიონიანი უკრაინისთვის მათი გმირია.
მიშას საერთაშორისო აღზევების ფონზე, ჩვენ ქვეყანაში, საქართველოში:
1. ეკონომიკური სიტუაცია კიდევ უფრო უარესდება
2. „ოცნება“ რეიტინგს კარგავს, პრინციპში, ურეიტინგოა (მისი პოლიტიკური კაპიტალი არა მისი რეიტინგი,არამედ "9 წელია").
3. „ოცნება“ აღარც არსებობს, ის დატოვა ხალხის პარტიამ (დავითაშვილი), მწვანეებმა (გაჩეჩილაძე), ტოვებს ეროვნული ფორუმი, ხოლო არჩეული პრეზიდენტი ურჩობს, მეტიც - ივანიშვილთან გაბუტულია და სააკაშვილის აშენებულ რეზიდენციაში შევიდა, რითაც გაამყარა მისი ინსტიტუციური და მორალური უფლებები და გახდა დამოუკიდებელი მოთამაშე.
4.უკვე მეორე არჩევნები მოიგო „ოცნებამ“ ზიზღით და რევანშისტული ლოზუნგებით, მესამე არჩევნები მოდის.... საქმე რთულადაა.
5.საგარეო პოლიტიკური სიტუაცია „ოცნებას“ აშიშვლებს.
რა დარჩენია ხელისუფლებას, გარდა იმისა, რომ გაანადგუროს ოპოზიცია, უძაღლო ქვეყანაში კატად დარჩეს და იყეფოს ?
მაგრამ, როგორ უნდა გააკეთოს ეს, როდესაც:
1.ადეიშვილი უნგრეთის პრეზიდენტის მრჩეველია;
2.ახალაიებიდან ერთი დაკავებულია, მეორე ძებნაშია, მესამეს ბრალი წაუყენეს;
3.მერაბიშვილი ციხეშია;
4.კეზერაშვილზე სისხლი ჩააქციეს, მაგრამ გაექცათ...
5.უგულავას ბრალი წაუყენეს, მერობიდან გადააყენეს, საქმე სასამართლოშია;
6.ბოკერია ყველაზე ჭკივანი აღმოჩნდა, ისე უმუშავია, „პრიჩინა“ ვერ მოუძებნეს
ვინღა დარჩა?
და მაინც, ოპოზიცია გაცილებით ძლიერად გამოიყურება (ინტელექტუალურად, მორალურად), ვიდრე ვინმეს წარმოედგინა.
რა უნდა გააკეთოს ხელისუფლებამ რომ ოპოზიცია გადატეხოს ?
უნდა "მოუგვაროს" ან მიშას, ან ქვეყანაში არსებულ ოპოზიციას მთლიანად, ამისათვის დარჩათ ორი თემა:
ა) ჟვანიას საქმით სპეკულირება.
ბ) მედიის მთლიანად კონტროლი.
ჟვანიას საქმე პრეზიდენტის სასახლის თემას საეჭვოდ დაემთხვა.
მარგველაშვილის პირველი ბრიფინგიდან,რომელიც გამართა ავლაბარში, ეს კადრები აიტვირთა რამდენიმე საათში...
ჟვანიაზე გავიგეთ, რომ ჰაკიმ ფაშა შოკირებულია ზოდელავას მიერ წელიწადნახევრის წინ დატოვებული მასალებით.
წელიწადნახევარი სეიფს ხსნიდნენ და რომ გახსნეს - ეს რა ნახეს, ზოდელავას ბომბი დაუტოვებია...
მედიას დარტყმა მიაყენეს,რეიტინგები აღარ არსებობს, მაგრამ ის არ გამოუვიდათ, რასაც ელოდნენ, თუმცა „რუსთავი 2“-ის საქმეზე ოქრუაშვილი დაკითხეს გუშინ.
ამ ფონზე ივანიშვილი ჰყვება ხელისუფლებასთან ურთიერთობის დეტალებს შემდეგი ფრაზებით:
1.“ეს შიდა სამზარეულოა“
2.“ირაკლი ორჯერ თქმას არ საჭიროებს“
3.“მარგველაშვილს ორი თვე ვარწმუნებდი, მაგრამ მან ხასიათი გამოავლინა და არ დამიჯერა“
4.“ჩემი დეიდაშვილი ტრანზიტის და ბიზნესის გადანაწილების თემებს ალაგებს“
5.“ირაკლისთან (პრემიერთან) ყოველდღიური ურთიერთობა მაქვს“
6.მე ვწყვეტდი, პრეზიდენტი ვეტოს გამოიყენებდა თუ არა
ანუ ის ამბობს, რომ ჯამაჰირიის ლიდერი მუჰამედ კადაფია... ისე, კადაფიმ როგორ დაამთავრა, ხომ არ გახსოვთ?
ანუ ბიძინა ამბობს: ფეხებზე მკიდია დემოკრატია, კონსტიტუციური ჩარჩოები, პრეზიდენტი, მედიის თვისუფლება, უდანაშაულობის პრეზუმფცია, მე ეხლა მიჭირს, ჩემი მთავრობა დისკრედიტირებულია, ეკლექტურია და სუსტია, არჩევნებისთვის თუ ვერ მოვსპე მთავარი ოპოზიცია და მათ კარგი შედეგები დადეს, ერთი წელიც არ იქნება გასული და „ოცნება“ დაიშლება, ბიძინას კი 2016 წლიდან საქართველოში აღარ დაედგომება.
ამიტომ, ის გადმოდის შტურმზე, მიდის აბსოლუტურ ვა-ბანკზე.
ამ კვირებში წყდება გაუვა თუ არა ეს მას.
ამ კვირებში წყდება საქართველოს ბედი!“.
რუბრიკიდან: "საქართველოს მოქალაქის ნააზრევი"