2014-03-22 23:42

საქართველოს უზენაესი სასამართლოს გადამდგარი მოსამართლე, ამჟამად მოსკოვში მცხოვრები ლამარა სორდია–შევცოვა, რომელიც ამჟამად ადვოკატია, საქართველოს მესამე პრეზიდენტს რჩევებს აძლევს.

ლამარა სორდია–შევცოვა მიხეილ სააკაშვილს ურჩევს, არ წამოეგოს ანკესს და საქართველოში არ ჩავიდეს, რადგან მახეს უგებენ. სორდია–შევცოვა მიხეილ სააკაშვილს „საქართველოს ყველა დროის პრეზიდენტს“ უწოდებს:

„მიხეილ სააკაშვილს, საქართველოს ყველა დროის პრეზიდენტს! მიშა! არავითარ შემთხვევაში არ ენდოთ ამ თაღლითებს! ნუ ჩააგდებთ საფრთხეში თქვენს სიცოცხლეს! არ ჩახვიდეთ! თქვენ საქართველოს, მის ხალხს სჭირდებით. იმ ორი **** (წერილის ნაწილი გამოტოვებულია მისი არაეთიკურობის გამო, – რედ.) ადამიანის გარდაცვალებაში არაფერი გაურკვეველი არ არის დარჩენილი და მათი ცხედრებით მანიპულირება მხოლოდ თქვენს დისკრედიტაციას ისახავს მიზნად.

თქვენ მახეს გიგებენ! ისინი ყველანაირ სისსაძაგლეზე არიან წამსვლელენი! როგორც საქართველოს უზენაესი სასამართლოს გადამდგარი მოსამართლე და ადვოკატი, რომელსაც მართლმსაჯულების სისტემაში მუშაობის ნახევარსაუკუნოვანი გამოცდილება აქვს, როგორც უფროსი ასაკითა და პროფესიონალური გამოცდილებით, გირჩევთ:

გააკეთოთ განცხადება პროკურატურაში, რომ ვერ ჩახვალთ სწორედ სიცოცხლის საფრთხეში ჩაგდების გამო (სიცოცხლე ყველაფერზე ძვირფასია) და ჩვენების მიცემაზე თქვენი თანხმობის შემთხვევაში გაუკეთოთ ორგანიზება გამომძიებლის ჩასვლას თქვენთან. არსად, არცერთ კანონში არაა ნათქვამი, რომ დაკითხვა მაინცდამაინც გამომძიებლის კაბინეტში უნდა გაიმართოს“, – წერს გადამდგარი მოსამართლე მიხეილ სააკაშვილს.