2014-03-15 17:16

ვარკეთილში, 180-ე საჯარო სკოლის ეზოში წუხელ გვიან ღამით 24 წლის ახალგაზრდა გოგონას ცხედარი იპოვეს. გარდაცვლილს ჭრილობები დანით აქვს მიყენებული.  მკვლელობა სავარაუდოდ ეჭვიანობის ნიადაგზე მოხდა.

პოლიციამ დამნაშავის დაკავება ცხელ კვალზე შეძლო. ამოღებულია მკვლელობის იარაღი. დაკავებული აღიარებს დანაშაულს, მომხდართან დაკავშირებით შს სამინისტრო დეტალურ ინფორმაციას ავრცელებს.

,,შინაგან საქმეთა სამინისტროს თბილისის მთავარი სამმართველოს დეტექტივების სამმართველოს და ისანი-სამგორის სამმართველოს თანამშრომლებმა, ერთობლივად ჩატარებული ოპერატიულ-სამძებრო და საგამოძიებო ღონისძიებების შედეგად, 1981 წელს დაბადებული სერგო ა. გაზრახ მკვლელობის ბრალდებით დააკავეს. გამოძიებამ დაადგინა, რომ დაკავებულმა 14 მარტს, საღამოს, თაყაიშვილის ქუჩაზე, 180-ე სკოლის მიმდებარე ტერიტორიაზე ეჭვიანობის ნიადაგზე ურთიერთშელაპარაკებისას, დანით გულმკერდის არეში მრავლობითი ჭრილობა მიაყენა 1989 წელს დაბადებულ ანა ოვანესიანს, რომელიც ადგილზე გარდაიცვალა.

სამართალდამცველებმა, ცხელ კვალზე ჩატარებული ოპერატიული ღონისძიების შედეგად, ბრალდებული მომხდარიდან რამდენიმე საათში დააკავეს. დანაშაულის ჩადენის იარაღი – დანა ნივთმტკიცებად ამოიღეს.დაკავებული ჩადენილ დანაშაულს აღიარებს. გამოძიება განზრახ მკვლელობის ფაქტზე მიმდინარეობს (საქართველოს სსკ-ის 108-ე მუხლით).“- ნატქვამია ოფიციალურ განცხადებაში.